2014 жылы 13 қаңтарда біздің қаламызда, балаларды әскери-патриоттық бағытқа тәрбиелеу мақсатында, оқу ісінің үздігі, РФ және ҚР ғарыш айлағына зор үлес қосқан үшін екі мәрте төс белгісімен марапатталған Қарибекова Мағрифа Аманбекқызының ұйымдастыруымен, балалар мен жеткіншектер сарайында, сағат 11.00-де «Қарағанды ғарыш айлағы» атты жылдық мүшайраның жабылу кезеңі өтті. Бұл іс-шараға Қарағанды қаласының зиялы қауымдары, ғарыш саласына қатысы бар ардагерлер, Қарағанды мен Теміртау қалаларының жаңашыл кадет сыныптарының оқушылары, Ботақара – Ағадыр кентінен келген оқушылар, мұғалімдер қатысты.

Аталмыш іс-шара  Кеңес Одағының батыры Нүркен Әбдіровтің інісі, полковник Әбубәкір Әбдіровтің қатысуымен және Нұркен Әбдіров даңғылындағы батыр ескерткішіне гүл шоғын қоюдан басталды. Одан әрі мерекелік іс-шара балалар мен жеткіншектер сарайында өз жалғасын тапты. Мектебіміздің «Әлия» және кадет сыныптары, сонымен қатар, № 91 ЖББОМ кадет сынып оқушылары және Қарағанды облысы Ішкі істер басқармасының жылдам қабылдау тобы өздерінің дайындықтарын көрсетті.

Қарағанды облысы білім басқармасының дипломымен Ю.Н.Павлов атындағы №35 жалпы білім беретін орта мектебінің директоры Агзамова Зауре Омиртаевна және  № 91 жалпы білім беретін орта мектебінің директоры Изтулеуова Сәуле Даубаевна марапатталды. Мектебіміздің ғылыми-әдістемелік жұмысы директордың орынбасары Маженова Гульзада Сериковна, директордың тәрбие ісі жөніндегі орынбасары Копбалина Эльмира Жанатовна, музыка пәнінің мұғалімі Толеуов Асылбек Самарканович, кадет сыныбының тәрбиешісі Сатбеков Аян Мухаммедбекович, Әлия сыныбының тәрбиешісі Нейман Татьяна Васильевна, Қарағанды облысы білім басқармасының грамоталарымен марапатталды.

Әсем әуен шараны әрлендіре түсті.