Қарағанды қаласының 80 жылдық мерей тойына қарсы № 82 жалпы білім беретін орта мектебінде қаламыздың есімі әлемге әйгілі суретшісі Кәріпбек  Куюковпен  кездесу ұйымдастырылды. Семей полигонының әсерінен екі қолсыз жаралып, тісімен және аяқ саусақтарымен сурет сала отырып, бүкіл халықты тамсандырған Кәріпбек ағаны білмейтін адам, танымайтын ел жоқ шығар.  Мектебімізге келетінін естіген оқушылар бар өнерін ортаға салып, белсенділік танытты. Бірнеше оқушылар сурет салып әкеліп, ұстаздарының көмегімен оқушылар шығармашылығынан көрме ұйымдастырып, ән-жырдан шашу шашты. Кездесу кешіне Кәріпбек ағаның да құр қол келмегенін аңғардық. Балаларға өз өмірінен сыр шерте отырып, Семей полигонының талай адамның арманын тәрк етіп, талай жанның  жанына жара салғанын бейне фильм арқылы түсіндірді. Америка, Франция, Ресей, Жапон елдерінде ұйымдастырған  көрмедегі салған суреттерін оқушылар ғана емес, кешке қатысушы ұстаздар мен ата-аналар да тамсана тамашалады.

Есімін ақпарат беттерінен оқып, суреттерін сырттай тамашалап жүрген мектеп оқушылары үшін талантты жерлесімізбен бетпе-бет кездесудің өзі үлкен қуаныш, рухани байлық, естен кетпес естелік  болды. Осындай мағыналы да мәнді кездесуді ұйымдастырушы бастауыш сынып мұғалімі Исина Нұргүл Жеңісқызына алғысымыз шексіз.

Қанға сіңсе бұл өнер,

Қадіріңді арттырар.

Өнерлісін ардақтап,

Қара көз ел тік тұрар-демекші,  бүгінгі кешіміздің қонағы болған Кәріпбек Куюков ағамызға сарқылмас өнер, ұзақ ғұмыр тілей отыра ақ жүрегіне дақ салынбасын дегіміз келеді.

Бастауыш сынып бірлестік жетекшісі:   Абугалиева С.Н.