2016 жылдың 13 қыркүйегінде Қарағанды облысының тілдерді дамыту жөніндегі басқармасы және «Өрлеу» біліктілікті арттыру ұлттық орталығы» АҚ филиалы Қарағанды облысы бойынша педагогикалық қызметкерлердің біліктілігін арттыру институтының ұйымдастыруымен Қарағанды қаласы №38 гимназияда «Қазақ тілін екінші тіл ретінде оқыту әдістері» тақырыбындағы облыстық семинар өткізілді.

Семинар қалалық және аудандық білім бөлімдерінің әдіскерлері, орыс тілінде оқытатын мектептердің қазақ тілі мен әдебиеті пәндерінің мұғалімдерінің қатысуымен өтті.

Қарағанды облысының тілдерді дамыту жөніндегі басқармасының басшысы Гүлнарайым Хасенқызы Қаңтарбекова семинардың мақсат-міндеттерімен таныстырып, ашылу салтанатын өткізді.

 Қарағанды №38 гимназия базасында өткен мазмұнға толы семинар барысында жаңартылған білім беру мазмұны бойынша қазақ тілін оқытуды ұйымдастырудың негізгі ұстанымдары туралы қызу талқыланып, жаңашылдыққа қадам басқан педагогтер үшін алары мол тағылымға толы іс-шара болды. Жаңа мазмұнда өткен Сакимбаева Алмагул Амангелдиновнаның шеберлік сыныбы әріптестер тарапынан  жоғары деген бағаға ие болды. Семинар соңында біліктілікті арттыру институтының аға оқытушысы Казиза Габдоллаевна Смагулова, Мұратбек Балтинович Сулейменов жаңартылған білім мазмұны бойынша қазақ тілін оқыту ерекшеліктеріне тоқталып, семинарды қорытындылады. Семинарға қатысқан педагогтер қатысушы сертификаттарын иеленді, ал шеберлік сыныптарын өткізген білікті ұстаздар алғыс хаттармен марапатталды.