Мектеп кітапханасы жылдар бойы шығармашылық байланыста келе жатқан Қарағанды қаласының Орталықтандырылған кітапханалар жүйесі КММ-нің №11 балаларға қызмет көрсету филиалы бізге қонақ болып, Ұлт ұстазы, Алаш қайраткері, қазақ халқының ардақты ғалымы Ахмет Байтұрсынұлының туған күні мен Қазақстан халықтары тілдері күніне арналған танымдық сағат өткізді. Іс-шараны мектеп кітапханасының меңгерушісі ашып, ұстаздар мен оқушыларды атаулы мерекемен құттықтап, сөз кезегін арнайы келген қонақтарға ұсынды. Ахмет Байтұрсынұлы – саналы ғұмырын ұлт еркіндігі мен елдің әдебиеті, мәдениеті, ғылымы жолына арнап, ұрпаққа қызмет етудің асыл үлгісін көрсеткен тарихи тұлға. Ол – тек қазақ халқы ғана емес, бүкіл түркі жұрты қадірлеген ұлы ғалым. Шара барысында арнайы дайындалған бейне шолу көрсетіліп, оқырмандар «Ахмет Байтұрсынұлы кім?» тақырыбындағы сөзжұмбақты шешіп, білімдерін сынады. 5 қыркүйек – тек мереке күні ғана емес, сонымен қатар әрбір азаматты ана тілін ардақтап, оны үйреніп, дамытуға шақыратын мәні терең күн. Бұл күн – Ахмет Байтұрсынұлының ұлт болашағы үшін жасаған еңбегіне тағзым, тілдің мәртебесін көтеруге арналған жауапты қадам. Ұлт ұстазының аманаты – қазақ тілін сақтау, дамыту және ұрпаққа аман жеткізу. Тілге құрмет – елге құрмет екенін әрқайсымыз жүрегімізде ұстауымыз қажет.