Білім беру ұйымдарындағы педагогикалық этика кеңесі туралы ереже

Білім беру ұйымдарындағы педагогикалық этика кеңесі – білім беру ұйымдарында құрылатын алқалы орган болып табылады және педагогтардың педагогикалық этиканы сақтау мәселелерін қарастырады.

Кеңеске білім беру ұйымдарының басшылары мен педагогтарының педагогикалық этиканы бұзу мәселелері бойынша жеке және заңды тұлғалар жүгінуі мүмкін.

Кеңестің шешімдері ұсынымдық сипатқа ие.

Педагогикалық этика кеңесінің негізгі міндеттері:

• Педагогикалық этиканы бұзу фактілерінің мониторингі, алдын алу және ескерту;
• Педагогикалық этиканы бұзу жағдайларына байланысты жанжалдарды реттеу;
• Педагогтардың жауапкершілігіне қатысты мәселелерді дұрыс қарастыру үшін қажетті және жеткілікті мән-жайларды жан-жақты, толық және объективті зерттеу;
• Педагогикалық этиканы бұзуға ықпал ететін себептер мен жағдайларды қарастыру және олардың негізінде білім беру ұйымының басшысына және білім беру бөліміне ұсынымдар әзірлеу.

Педагогикалық этика кеңесінің функциялары:

• Өз отырыстарында білім басқармасы органдарының өкілдерін, педагогтарды, білім беру ұйымдарының басшыларын және қаралатын мәселелерге қатысы бар тұлғаларды тыңдау;
• Мемлекеттік органдар мен білім беру ұйымдарынан кеңестің алдында тұрған міндеттерді орындау үшін қажетті құжаттарды, материалдарды және ақпаратты сұрату;
• Педагогтардан, білім беру ұйымдарының басшыларынан және қаралатын мәселелерге қатысы бар тұлғалардан түсініктеме немесе анықтама талап ету;
• Білім беру бөлімінің және білім беру ұйымының басшысына педагогикалық этиканы бұзу фактілерін тексеру туралы ұсыныстар енгізу;
• Еңбек тәртібін нығайту және педагогикалық этиканы бұзудың алдын алу бойынша білім беру бөлімі мен білім беру ұйымының басшысына ұсынымдар енгізу;
• Білім беру бөлімі мен білім беру ұйымының басшысына педагогикалық этиканы бұзғаны үшін жауапкершілік туралы ұсынымдар беру;
• Білім беру ұйымының басшысы кеңестің ұсынымдарын тиісті түрде қарастырмаған жағдайда, уәкілетті мемлекеттік органдарға немесе тиісті лауазымды тұлғаларға ұсыныстармен жүгіну;
• Тараптарды татуластыру жұмыстарын жүргізу;
• Қажет болған жағдайда кеңес отырысын онлайн форматта өткізу.

Педагогикалық этика кеңесінің құрамы:

Кеңес құрамына мынадай тұлғалар кіреді:

• кемінде екі педагог;
• кемінде екі зейнеткерлікке шыққан педагог;
• білім беру басқармаларының (бөлімдерінің) және біліктілікті арттыру ұйымдарының өкілдері;
• мәслихат депутаттары;
• білім беру саласында қызмет атқаратын қоғамдық бірлестіктердің, үкіметтік емес ұйымдардың және кәсіподақтардың өкілдері.

Кеңес құрамына кіре алмайтын тұлғалар:

• соттың шешімімен әрекетке қабілетсіз немесе әрекетке қабілеті шектеулі деп танылғандар;
• соттың шешімімен белгілі бір мерзімге мемлекеттік лауазымдарды атқару құқығынан айырылғандар;
• әкімшілік сыбайлас жемқорлық құқық бұзушылықтары үшін жазаға тартылғандар;
• бұрын сотталған немесе қылмыстық жауапкершіліктен ақталмайтын негіздер бойынша босатылғандар;
• мемлекеттік органдар мен ұйымдардан теріс себептермен жұмыстан босатылғандар;
• ДОКСО-ның штаттық қызметкерлері (ДОКСО басшысынан басқа);
• білім беру ұйымдарының қызметтегі басшылары.

Өтініштерді қарау тәртібі:

Жеке немесе заңды тұлғаның өтініші қаралғаннан кейін оның нәтижесі туралы өтініш берушіге отырыс барысында немесе оны қарау нәтижелері бойынша дереу хабарланады.

Педагогқа немесе білім беру ұйымының басшысына қатысты істі қарау келесі жағдайларда уақытша тоқтатылады:

• уақытша еңбекке жарамсыздық кезеңінде;
• еңбек демалысында немесе іссапарда болған кезде;
• мемлекеттік немесе қоғамдық міндеттерді орындау үшін өз қызметтік міндеттерін атқарудан босатылған жағдайда;
• қайта даярлау, біліктілікті арттыру курстарында немесе тағылымдамадан өту кезеңінде.

Педагогтың құқықтары:

Педагогикалық этиканы сақтау мәселесі қаралған кезде педагогтың құқығы бар:

• қаралатын мәселе туралы жазбаша түрде ақпарат алуға;
• қаралатын мәселеге қатысты барлық материалдармен танысуға;
• өз құқықтары мен заңды мүдделерін заңға қайшы келмейтін барлық тәсілдермен жеке немесе өкілі арқылы қорғауға;
• кеңес шешімін жазбаша түрде алуға.

Кеңес отырысын ұйымдастыру:

Кеңестің хатшысы кеңес мүшелерін және мүдделі тұлғаларды отырыстың өтетін орны мен уақыты туралы кемінде 1 жұмыс күні бұрын хабардар етуге міндетті.

Кеңес отырысында өтініш берушілер мен жауапқа тартылатын тұлғалар қатыспаған жағдайда, егер олар отырыс өтетін уақыт пен орын туралы кемінде 1 жұмыс күні бұрын тиісті түрде хабарландырылған болса, істі олардың қатысуынсыз қарауға жол беріледі.

Білім беру ұйымының басшысы мен педагогқа қатысты тергеу амалдары және олардың негізінде қабылданған шешімдер тек олардың жазбаша келісімімен жарияланады.