Ішкі істер министрлігі "Жасөспірім" атты профилактикалық іс-шара өткізуде.
Polisia.kz хабарлауынша, Ішкі істер министрлігі 2025 жылды «Құқықбұзушылықтардың алдын алу жылы» деп жариялады. «Заң және Тәртіп» қағидатын жүзеге асыру аясында ағымдағы жылдың 10 сәуірі мен 6 мамыры аралығында республика аумағында «Жасөспірім» жедел-алдын алу іс-шарасы өткізілуде.
Негізгі мақсат — жасөспірімдер арасындағы құқықбұзушылықтардың алдын алу және балалардың құқықтарын қорғау. Іс-шараға ішкі істер органдарының жеке құрамы тартылып, білім беру, денсаулық сақтау, прокуратура органдары және қоғам өкілдері жұмылдырылды.
Іс-шара барысында келесі бағыттарға ерекше назар аударылады:
-алкогольді ішімдіктер ішетін, түнгі ойын-сауық орындарында жүрген және түнгі уақытта ата-анасының еріп жүруінсіз көшеде жүрген кәмелетке толмағандарды анықтау;
-балаларға алкогольдік және темекі өнімдерін сату фактілерін анықтау;
девиантты мінез-құлықты жасөспірімдерді және өз балаларына тәрбие беру жөніндегі міндеттерін орындамайтын ата-аналарды анықтап, есепке қою;
-жасөспірімдер арасындағы қылмыстық әрекеттердің, әсіресе бопсалаудың жолын кесу;
-балалардың өмірі мен денсаулығына қауіп төндіретін интернет-ресурстарды анықтап, бұғаттау;
-оқушылармен құқықтық мәдениеті мен құқықтық санасын арттыру мақсатында дәрістер өткізу.
— Азаматтардан балалардың құқықтарының бұзылуы туралы жайттарды полицияға дереу хабарлауды сұраймыз, – деді Ішкі істер министрлігі әкімшілік полиция комитеті басқармасының бастығы Әсет Оспанов.