4 қазан 2013 жылы №4 негізгі орта мектепте ұстаздар мерекесі аталып өтті. Бұл күн ұстаздарды әсем әуенмен, қошеметпен таңертеңгілік қарсы алудан және мектепшілік жиыннан басталды. Жиында өзін-өзі басқару күнінің жоспары  ұсынылды. Мұнда 9 «А» сынып оқушылары сынып жетекшілер және пән мұғалімдері болып тағайындалды. Мектеп директоры Орынбасар Дидар, директордың оқу-тәрбие ісі жөніндегі орынбасары Исмадияров Тимур, тәрбие ісі жөніндегі орынбасары Байдавлетов Мейірбек сайланды. Мектеп ұстаздары 9 сынып оқушылары орнына  жеке сынып ретінде  отырды. Сабақ барысында ұстаз болып тағайындалған оқушылар өз жұмыстарын дұрыс атқара білді. Сабақ аяқталған соң жиын залында «Қалдырған ізің – мәңгілік» атты мерекелік жиынға  ұстаздар, оқушылар, ата-аналар бір адамдай жиналды. Бұл шараның шымылдығын ашқан жүргізушілер мектеп психологі Толеубекова Гүлжаухар, 8 «А» сынып оқушысы Біргебаев Қуандық. Күз мезгілінде еліміз салтанатты түрде атап өтетін «Ұстаз» күні мерекесіне арналған шараны   мектеп директоры Орманбаева Дана Тоғайбаевна  ұстаздарды шын жүректен құттықтауымен бастады. Ұстаздарымызға арналған кеште би билеп, әннен шашу шашқан оқушыларымызды атап өтсек: «Ұстазға тағзым» әнімен 9 сынып оқушысы Раймжанова Таңшолпан, Назерке би тобының орындауында «Кукарелла» биі, «Ана туралы» әсем әнмен Асан Руслан, 4 сынып оқушылары Нуруллаева Жансая, Ысқаков Ислам, Маралова Мадина «Мектебім» әні, 3 сынып оқушысы Садуақас Диас әннен шашу шашты. Осы кеште 5-9 сынып оқушыларының ұйымдасуымен шәкірттік пәк жүректен шыққан ақ тілек, жылы лебіздерін мектеп ұстаздарына және алғашқы ұстаздарына видеокөрініс  арқылы жеткізді.

Ұжымға жаңадан қосылған ұстаздарымызды кәсіподақ ұйымының төрағасы Жадрасинова Айнұр Жаңбырбаевна төл мерекелерімен құттықтады. Осы ұстаздарымыз ұжым қатарына кіре отырып ұжым алдында ант қабылдады.

Мұғалімнен өнеге-білім алып, өмір теңізіне құлаш ұрған кез келген шәкірт ұстазымен мақтанады. Ұстаздар мерекелеріңіз тағы да құтты болсын дей келе барлық қатысушылар ортаға шығып «Ұстазым» әнімен кешті аяқтады!

Кешті ұйымдастырған: бастауыш сынып мұғалімі Бакирова Рахима Абибуллақызы, география пәнінің мұғалімі Әлжанова Дариға Өмірәліқызы, мектеп психологі Толеубекова Гүлжаухар Аскаровна.