Алдыңғы толқын ағалар ұлағаты

  Қойнауы кенге толы, қазыналы қаламыз Қарағындының тағылымға мол тарихына көз жүгіртсек рухани байып, кемелденіп қаламыз. Осындай тәлім-тәрбиесі зор іс-шаралардың бірін, облысымыздың телевидение жүйесінің 60 жылдық мерейтойына орай, біздің оқушылар өз көздерімен Қарағанды қаласындағы Мемлекеттік облыстық мұрағат ғимаратында тамашалап қайтты. Қала тарихына телевидение жүйесінде талмай қызмет жасап өз үлестерін риясыз қосқан ардагерлермен жүздесіп сұхбаттасудың өзі бір тағылым, тәрбие көзі. Алдыңғы толқын ағалар мен ардагер әжелердің мейірім мен шапағатқа толы көптеген ұлағатты сөздері 93 гимназия  ұландарының жадында жатталатыны сөзсіз. Сонау 1958 жылдан бері қаламыздың  «SARYARKA» телеарнасы арқылы көрермен жүрегіне ұялаған бағдарламалар саны қаншама. Солардың басы-қасында жүрген телеарнаның ардагері, алғашқы телережиссерлардың бірі, әжеміз, Жабаева Г.Ж. туралы стендтер мен бейнематериал, қызметтестері мен шәкірттері айтқан мәліметтер тарих толқынымен тербеткендей күйге жеткізді. Жас ұрпақтың санасын рухани жаңғырту жолында жасалған бұл шараға біз алғыстан басқа айтарымыз жоқ, себебі телеарна ардагерлерінің ұлағат пен шапағатқа толы өмірі – жас толқын – жасөспірімдерге үлгі, өнеге.