Елдігімізді ту қылып паш ететін, талай боздақтарға асыл арман болған Тәуелсіздік күнін №93 гимназия ұжымы да бір кісідей атап өтті. «Тәуелсіздік тұғырым» деп соққан әрбір жүректе  бұл күні туған халқына, туған жеріне деген сүйіспеншілік оты маздап жанғандай. Салтанат нұрын бұндай қуанышты да қасиетті күні гимназия ұжымы дайындаған «Нұрын төккен Қазақстаным!» атты мерекелік концерт төгіп тұрғандай болды. Мерекелік концерт гимназияның ең үздік вокал тобының Қазақстан Республикасының қасиетті Гимнін орындаумен ашылды. Гимназия  директорының орынбасары Яндоло Елена Николаевнаның жүрекжарды, нұрлы болашаққа жетелейтін сөздері салтанатқа жиналған қауымның жүректеріне жеткендей. Сондай-ақ, бұндай асқан құрметпен өтетін айтулы мерекемен гимназияның Кәсіподақ комитетінің төраймы Мұсабекова Күләш Амангелдіқызы құттықтап, жалпы Қазақстанымыздың жеткен жетістіктерін тағы бір мәрте еске түсіріп, мақтаныш сезімін ұялатты. Әрі қарай жалғасын тапқан мерекелік думан гимназия оқушыларының өнерлерімен өрілді. Биыл алғаш рет осындай қадірі мен қасиеті мол мейрамға ерекше ыждаһаттылықпен дайындалған домбырашылар ансамблі (Құдайбергенов Әлібек, Қасым Марал, Келбұғанова Іңкәр)  мен қобызшылар дуэті (Қасымқұлова Аида, Қанатова Әзиля) ұлттық нақышта орындаған музыкалық композициялары «Алашым» деп соққан әр жүректі тебірентті, әр жүректе өз орнын тапты деген ойдамыз. Осындай өрелі өнерді ұштай білген жас та болса, бас бола білген гимназияның музыкалық жетекшісі Құсайынова Әзиза Қуанышқызының кәсіби тұрғыдан алар асулары алда.

Бұл күні сахнадан айтылған өлеңдер, әуенді әндер еліміздің бірлігі мен жарқын болашағын әуелетті, асқақтатты. Осындай өнерлі жастардың басын қосып, тәлімін үйреткен «қазақ тілі» пәнінің мұғалімі Құлашева Әлимаш Көшенқызы. Жалпы, «қазақ тілі» кафедрасы ұжымының үлесі бұнымен шектелмеді. Осы кафедра мұғалімдерінің жетекшілігімен сахналанған көрініс (Ғ. Мұстафин. «Қарағанды» романынан үзінді) көрермендерді тәнті етті. Бұл орайда айта кететін жайт, рөлдерді сомдаған басқа ұлт өкілдері (біздің гимназия оқушылары) таза қазақ тілде өнерлерін паш ете білді.  

  «Тәуелсіздік тұғырым» деп соққан педагогикалық ұжым өкілдерінің жүректері жоғарыдағы іс-шаралармен шектелмеді, басқа да танымдық шараларды өз мәнінде өткізіп жатыр. Мысалы, сындарлы да саналы ой салатын сынып сағаттары, көрмелер, байқаулар, дөңгелек үстелдер. Осы орайда «Тарих» пәнінің мұғалімі Әділбаев Ардақ Маралұлының қосқан үлесін айтпай кетуге болмас.

Қорыта келгенде, Тәуелсіздікті ту қылып биікте ұстайтын   болашақ өрендер біздің гимназияда өсіп өне берсін!