Бүгін Шәкәрім атындағы гимназияда көктемнің шуақты мерекесі, Халықаралық әйелдер күніне орай "Есте қалар ғибрат сөз" тақырыбында мазмұнды, әсерлі кездесу өтті. Кездесудің қадірлі қонақтары - қаланың белгілі әйел қайраткерлері - «RESPUBLICA» партиясы филиалының әйелдер қанатының төрағасы, Қарағанды облысы әкімі жанындағы кәмелетке толмағандар ісі мен олардың құқықтарын қорғау комиссиясының мүшесі Камалиева Жібек Камалиқызы және Қарағанды қаласы, Қазыбек би ауданының «Аманат» партиясы филиалының төрағасы, Н.В. Гоголь атындағы облыстық кітапхана қызметкері Бектурова Алма Хабибуллақызы шақырылған болатын.
Кездесу барысында Шәкәрім жастары қайраткер қонақтарымыздан әйел адамның қоғамдағы рөлі, олардың жетістіктері және болашақ ұрпаққа қалдырған мұралары туралы қызықты әңгімелер тыңдады, сонымен қатар, жалпы мемлекетімізде әйелдердің алатын орны туралы, әйелдердің отбасындағы маңызы туралы ғибраты мол, тәрбиелік мәні зор тәлім алды, кемел келешекке бағдарларын айқындады.
Құндылықты дәріптеген кездесудің 2-бөлімінде Шәкәрім жастары қадірлі қонақтарымызға көкелерінде жүрген сұрақтарын қойып, өздерінің армандары, мақсаттары туралы ой бөлісіп, болашаққа бағытталған жоспарларын да айқындап, қайраткерлерден кеңес алды, бағыт-бағдарларын анықтап алды. Жастарды толғандырған мәселелер:
1) Қазіргі білім алу үдерісі көңіліңізден шыға ма?
2) Кәсіп бастаудың басты қағидалары қандай болады?
3) Сіздердің армандарыңыз орындалды ма?
4) Мамандық таңдағанда қалай қателеспеуге болады?
5) Ойыңызда жүрген орындалмаған мақсат, арманыңыз бар ма?
Кездесу соңында оқушылар өздерінің ризашылықтарын білдіріп, осындай кездесулер болашақта да жалғасын табуын тіледі.
