Балалар күні — әрбір оқушыға өз құқықтарының бар екенін, оларды құрметтеу, қорғау және сақтау қажеттігін еске салатын маңызды күн.

Бүгін 5–7-сынып оқушылары арасында «Менің құқықтарым» тақырыбында тәрбие сағаты өткізілді. Сабақтың негізгі мақсаты — балаларға өз құқықтары мен міндеттері туралы түсінік беру, жауапкершілікті сезіндіру.

Сабақ барысында оқушылар БҰҰ-ның Бала құқықтары туралы конвенциясының негізгі баптарымен танысты:

– есім және азаматтыққа құқығы;

– білім алуға құқығы;

– зорлық-зомбылықтан қорғалуға құқығы;

– медициналық көмек алуға құқығы;

– өз пікірін еркін айтуға құқығы;

– демалып, ойнап, қабілетін дамытуға құқығы.

Оқушылар берілген жағдаяттарды талқылап, құқықтың қай кезде сақталатынын, қай кезде бұзылуы мүмкін екенін ажыратуға тырысты. Сонымен бірге құқықпен бірге міндеттің қатар жүретіні, ал өзара құрмет пен түсіністік әр баланың өзін қауіпсіз әрі сенімді сезінуіне көмектесетіні айтылды.

Топтық жұмыстар жүргізіліп, балалар «Менің құқығым бар…» атты шағын постерлер жасап, өз ойларымен бөлісті. Олар құқықтарын қорғаудың және өзгелердің құқықтарын құрметтеудің маңыздылығын түсінді.

Өткізілген тәрбие сағаты оқушылардың саналы, ақпаратты және жауапкершілігі жоғары азамат болып қалыптасуына тағы бір қадам болды. Әр бала өз құндылығын сезініп, өзіне қорған бола алуы — біздің басты мақсатымыз.

Әрбір бала өзін қауіпсіз, қорғалған және қолдау сезінетін ортада өссін! Бұл тек мерекеде ғана емес, күн сайын орындалатын басты міндет.