БҮГІН ХАЛЫҚАРАЛЫҚ БАЛАЛАР КІТАБЫ КҮНІ

Кітап оқу, кітапқа ден қою біршама ілгерілеуде. Барша халық болып, мемлекет болып жастарға “артық білім кітапта” екенін күн сайын түсіндіріп жатырмыз. Жаппай кітап оқу әдетке айналатынына сеніммен қараймыз. Елімізде балалар әдебиеті де өз деңгейінде дамыған, балаларға арналған кітаптар жоқ емес, баршылық. Бұл орайда кітапханалардың үлесі де болу керек деген ойдамын. Балалардың кітап оқу мәдениеті, қызығушылығы қажетті арнаға түсуі үшін де кітапханашылардың еңбегі зор. Шәкәрім гимназиясының оқушылары бірнеше жылдың көлемінде қаламыздың зияткерлік, зиялылық орталығы бола білген кітапханалармен тығыз байланыста, етене жақын. Әсіресе Абай атындағы балалар кітапханасына барып әртүрлі зияткерлік ойындарға қатысып, кітап пен авторларға қатысты жаңалықтарға құштарлығын көрсетуге дайын.

Соның бір парасы - Марат Қабанбаев шығармашылығы мен өміріне қатысты білімпаздар кездесуін атап өткенді жөн көрдік. Бұндай зияткерлік кездесуді қызықты өткізуге барын салған кітапхана қызметкері Ольга Маторина Шәкәрім өрендерінің жақын досы, кітапқа құмарлықты арттыруға гимназия педагогтерінен қалыспай күш біріктіріп жүрген кәсіби мәртебесі жоғары маман.

Халықаралық балалар кітабы күні барша өрендерге септігін тигізіп, өніп өркендеулеріне арқау болсын! Өрісі кең, ақылы мен парасаты мол зиялы жастар өсе берсін!