ҰЛТТЫҚ СПОРТ – КӨШПЕНДІЛЕР МӘДЕНИЕТІ
Ұлттық спортты ұлықтауға арналған наурызнамадағы күн – 20-наурыз!
Ежелден көшпенділер тұрмысымен біте қайнасып келе жатқан ұлттық спортымыз – ұлттық мәдениеттің маңызды бөлігі.
Осындай ұлттық сананы тербейтін, ұлттық рух беретін спорт түрлерін әрі қарай насихаттау мақсатында, мәдени мұра ретінде сақтап қалуға, жас ұрпақтың бойына ұлттық құндылықтарды сіңірту мақсатында Шәкәрім гимназиясында «Жүйрік болсаң, оза шап!» атауымен 9-сынып параллелі арасында ұлттық спорт түрлерінен жарыстар өткізілді.
Жауаптылар 9А,9Б сынып жетекшілері Сарсембаева Г. О., Накатова А.Қ.
Ұлтымызға тән, «Асық ату», «Аударыспақ», «Арқан тартыс», «Жамбы ату», «Тоғызқұмалақ» сынды спорт түрлерінен сынға түскен жастар бойындағы бар өнерлерін сарп етіп жарысты. Әрине, ептілік пен жылдамдық, күш пен қайрат жарысқан сәтте ішінен ең күштісі, ең ептісі мен қайрат-жігері басым өрендер жеңіске жететіні белгілі. Алайда біз үшін басты мәселе – ұлттық спортымыз жас ұрпақтың ұлтымыз ежелден дәріптеп келе жатқан ұлттық сана-сезімін қалыптастырып күшейтуге ықпал жасау, бірлік символына айналған мереке рухын сезіндіру, өз бойларындағы адами, рухани, физикалық қасиеттерін әрі қарай дамыту, бабаларымыздан қалған басты мұра – қастерлі еліміз бен қасиетті жерімізді қорғайтын алтын асықтай өрендерімізге мотивация беру, көшпенділер өркениетінің бірегей мұрасын ерекше қастерлеп дәріптеуді үйрету, мақтан тұту. Ата-бабаларымыз бүкіл әлемге атқа отыру, ат спорты мәдениетін көрсетіп, қазіргі заманда бірнеше спорт түрлері ретінде дамып кетуіне ықпал жасағаны айдан анық.
Жалпы ұлттық спорт жас өрендерге не береді деген сұраққа жауап - дұрыс өмір сүру, салауатты өмір салты, адам өмірі, еңбегі, ұлттық құндылықтар, ар-намыс, қадір-қасиет, батылдық, күш-қайрат, ептілік, төзімділік және жылдамдық сияқты адами қадір-қасиеттерді береді. Сондықтан біздің ұлтқа тән дәстүрлі спорт түрлері тек жарыс-сайыс қана емес, сонымен қатар, онда көшпелі өркениеттің рухы жатыр, жас ұрпақтың өзін-өзі кемелдендірудің жолы мен тәсілдері жатыр, ата-бабаларымыздан қалған мақтан тұтарлық мұра жатыр. Сол асыл мұраны сақтап, ұрпақтан ұрпаққа жеткізу – елжанды ұрпақтың басты міндеті. Ұлттық мәдениетті, ұлттық спортымызды дәріптейтін жастар өсе берсін! Қасиетті Наурыз бәрімізге құтты болсын!
Шымыр да білекті, күшті де епті, қайратты да қайсар өрендеріміз көп болсын!
