«Әкелер өмірдің

Ең қымбат,

Ең құнды,

Ең биік

Мектебі» деп жырлады жерлес ақын бауырымыз Мирас Асан.

Бұл сөздің салмағын, тереңде жатқан мағынасын түсінген адам болса, ол әр әкенің баласы болса екен деп тіледім. Бүгін ордалы да арда білім ордамыз, Шәкәрім гимназиясында, әкелерге арналған «Әкешім – бәйтерегім» мерекелік фестивалі өтті. Мерекелік фестиваль «Әкелер жолы – ізгі жол» әкелер айлығының финалы ретінде және керемет көңілге қонымды мереке Алғыс айту мерекесіне орай өткенімен, мақсаты ауқымды - отбасылық құндылықтарды дәріптеу, әкелердің бала тәрбиесіндегі, ер балаларды тәрбиелеудегі рөлін нығайту, ер бала мен әке арасындағы тығыз әрі ыстық байланысты ұғындыру, әкеге деген құрмет пен сүйіспеншілікке тәрбиелеу,

отбасындағы әке орнын, рөлін көрсете отырып, ұлттық құндылықтар негіздеріне тоқталу, отбасында әке мен бала арасындағы қарым-қатынасты нығайту, отбасы ынтымақтастығын дамыту, үлкендерді сыйлауға, әкені пір тұтуға, адамгершілікке, әке мен ер азамат ұғымының мәнін түсінуге тәрбиелеу.

«Алты аға бірігіп әке болмас, жеті жеңге бірігіп ана болмас», деген дана халқымыз, әке мәртебесін, әке рөлін жете түсінуге бағыттағандай. Осы арнамен әкелерге арналған мерекеміз үш бөлімнен құралды:

1-бөлім - «Ұлым – мұрагерім» мерекеге келген оқушыларымыздың әкелері балаалрының қолөнер туындылары көрмесін тамашалады (дайындаған «Көркем еңбек» мұғалімдері Дәлбергенов Олжас Сәкенұлы мен Төкенов Қайрат Ушанұлы).

2-бөлім - «Менің әкем - ең жақсы адам» Q Talks форматында әкелердің белсенді қатысумен өтті. Әр әке бауыр еті баласының тәрбиесіне қатысты тұщымды ойлар айтып, пікір білдірді (дайындап өткізген ұлағатты ұстазымыз Тұрсынова Айткүл Мысырқызы).

3-бөлім - «Әкеме тағзым!» мерекелік концерті.

Танымы бастау алған тереңдіктен,

Келбеті көркемделген кемелдікпен,

Ассалаумағалейкум, қауымы әкелердің,

Ұлынан киелі күй, өлең күткен! – деп басталған әкелерге арналған мерекелік концерт, басынан аяғына дейін дарынды өрендеріміздің өнерімен өрілді. Мерекелік әзірлемеде тек қана әкелерге арналған ән-би, күй-өлең бала жүрегінен шыққан ыстық ықылас пен риясыз сезімді білдіріп, әкелерді тебірентіп жіберді. Әсіресе, 9Б сынып оқушысы, гимназиямыздың шебер күйшісі, «Серт» домбырашылар ансамблінің мүшесі, «Үкілі домбыра» қалалық байқауының 3 дүркін жеңімпазы, Әділ Мәуленнің орындауындағы «Әке толғауы» күйі!

Бұндай ауқымды мерекелік шараны басынан аяғына дейін шебер жүргізген өрендеріміз, 10А сынып оқушысы Әубәкір Әмір мен бүгін тырнақалды өнерімен көзге түскен кішкентай жұлдызымыз, 3А сынып оқушысы Нығыметова Айсананы да атап өткен жөн.

Мерекелік концертке әр беріп, өзіндік стилі бар өнерлерін паш еткен 3А сынып оқушыларына, Жұмадильдина Ясминаға да дән ризамыз (дайындаған Сейтенова Гүлнәр Жұмағалиқызы).

Барша әкелердің жүрегінен орын тапқан «Жан әкем» әнін асқан сезімталдықпен орындаған 5А, 5Б сынып ер балаларынан құралған хор, көркемдік жетекшісі, «Музыка» пәнінің мұғалімі Мақан Рәзия.

Әке өнегесі балаға бағыт нұсқап, үлгі болары сөзсіз. Ұлағаты мәңгілік ұлтымыздың «Әке – балаға сыншы» деген де әдемі әрі терең мағыналы даналығын бәріміз білеміз. Өз перзентінің болашағын ойлаған, ел ертеңін тәрбиелеуге зор үлес қосатын әкелердің арманын орындауға дайын, әке сөзін жерде қалдырмайтын, әке өнегесін көріп, салауатты өмір салтын ұстанатын өскелең ұрпақ, гимназиямызды, қаламызды, облысымызды, республикамызды әлемге танытып жүрген спортсүйер ұландарымызды мақтан тұтып, «Спортшылар шеруін» ұйымдастырған және сахналық көркемдеуші - гимназиямыздың хореографы Артықова Әсел Мейрамғалиқызы.

Әкелерге арналған мерекелік фестивалін жалғастырып, шымылдығын жапқан номерлер – 8Б сынып оқушысы, қалалық, облыстық қобызшылар байқауының лауреаты, дарынымен танылған аруларымыздың бірі – Сержан Адинаның музыкалық композициясы.

Мирас Асанның «Әкеме» өлеңі, анау-мынауға мұқалмас әке жүректерін тебірентіп жіберген Әубәкір Әмірдің шебер орындауы және өнерлі жастардың «Кел, билейік!» әні.

Ұлтымыздың, мемлекетіміздің, отбасыларының жоғын түгендеп жүрген, барын балаларына арнаған, үлгі-өнеге болатын біздің оқушыларымыздың әкелері жасасын! «Сіз – менің қаһарманымсыз!» дейтін перзенттеріңіз көп болсын, құрметті әкелер!