«АУҒАНСТАН АСУЫНДА ОТ КЕШКЕНДЕРГЕ МЫҢ ТАҒЗЫМ»
Ауған жеріне ауыр аманат арқалаған, өмір мен өлім белдескен сұрапыл шайқаста батылдық пен ерліктің ерен үлгісін көрсеткен ардақты ардагерлеріміз, жауынгер-интернационалисттердің өмір жолы – жас ұрпаққа ұлағатты үлгі, өмірлік өнеге. Осындай игі мақсатты көздеген Шәкәрім гимназиясының оқушылары Ауғанстан жерінен әскерімізді шығару күніне орай әскери-патриоттық «Ауғанстан асуында от кешкендерге тағзым» атты әдеби-музыкалық сағаты өткізілді. Бұл игі іс-шараны дайындап өткізген педгогтеріміз Журавлева Наталья Герасимовна, Диль Виктория Ивановна.
Әдеби-музыкалық сағаттың 1 бөлімін гимназия директоры Ахметова Аягүл Нұрабайқызы ашты, ол ауған соғысы ардагерлерінің соғыс өтінде рухы биік, ерліктері ерен болғанын, бейбіт күндері Тәуелсіз елімізге қосқан еңбектерінің үлесі зор екенін атап өтіп, қадірлі қонағымыз, ауған соғысының ардагері, «Қара майор ордені» иегері Айнабеков Ерғали Матайұлымен жас өрендерді таныстырды. Әдеби-музыкалық сағатты құрметті қонағымыз жалғастырып, тәлімі мен тәрбиесі мол естеліктерімен бөлісті. Қадірлі қонағымыздың жастық шағына шағын экскурс жасаған өнерлі өрендеріміз Ауған соғысы мазмұнында шағын қойылым мен музыкалық композиция ұсынып, көрермендердің ыстық ықыласына бөленді.
Сұрапыл соғыс майданында ерлікпен қаза тапқан мыңдаған жерлестерімізді, мәңгілікке сапар шеккен боздақтарымызды үнсіздікпен еске алу рәсімі де жас өрендер жүрегінен орын алды.
Еліне қайта оралмай,
Бақыт гүлін сыйға аламай,
Қаншама боздақ оққа ұшты
Алтын ошақ көре аламай!
Жанын қиған ел үшін.
Тоқта, досым, сабыр ет!
Үнсізідікпен бір сәтке
Басыңды иіп тағзым ет.
Әскери-патриоттық тәлімі зор іс-шарамыздың 2-бөлімі гимназиямыздың түлегі, Ауғанстан жерінде ерлікпен қаза тауып, мәңгілікке аттанған жауынгер-интернационалист Шаврин Игорь Петровичке арналған мемориалдық стендтің ашылуымен жалғасын тапты. Мемориалдық стендті ашу рәсіміне қатысқан қадірлі қонағымыз, Ерғали Матайұлы, гимназия оқушыларына, әкімшілігіне көрсетілген ықылас, құрмет-ілтипаттарға ризашылығын білдірді.
«Ерлік — елдің туы». Ер қуаты — қару болса, ел қуаты — батырлары, саңлақ сарбаздары мен сардарлары. Халық қашанда қаһарман ұлдарын пана тұтқан.«Отан үшін күрес, ерге тиген үлес» деген халқымыздың осы даналығын қайда жүрсек те, қашанда жүрек түпкірінде, сана сандығында сақтаулы жүрсе, жас ұрпақ азаматтық парызын адал ақтауды ұмытпас. Ауған қаһармандарын қадірлеп, құрметтеп, рух жасампаздығымен қолдап отырайық.
