«СЕНІҢ ТАҢДАУЫҢ» ЕҢБЕК САБАҒЫНАН РЕПОРТАЖ

Еңбек адамы, жалпы кез келген еңбек атаулысы әрқашан құрметке ие, қасиетке толы. Сол киелі де қастерлі ұғымды жете түсінген адам ғана еңбекте алда болып, абырой-атақ, марапат-мадақтамаға кенелетінін жастайымыздан сіңіріп өстік.

Мемлекет басшымыз Қ-Ж.К. Тоқаев Ұлттық құрылтайда еңбек адамдарының мәртебесін арттыру мәселесін көтерді: "Қажетсіз мамандық болмайды, біліксіз маман болады. Ерінбей еңбек еткен жан өз ісінің майталманы атанады. Ал кәсібін толық меңгерген адам қашанда сұранысқа ие болады. Біз еңбек адамының мәртебесін көтеруге баса мән береміз. Елімізде түрлі саланың кәсіби мерекесі бар. Көбінесе мұндай мейрамдар назардан тыс қалып жатады". Осы орайда президент Еңбек күніне орай еңбек ардагерлерін, үздік мамандарды ұлықтауды ұсынды. "Бұл қадам қоғамда еңбек культін орнықтыруға жол ашады. Шын мәнінде, қандай жұмыс істеп жүргенің емес, оны қалай істеп жүргенің әлдеқайда маңызды. Министр немесе әкім болсын, құрылысшы, дәрігер, мұғалім болсын, ең бастысы, әркім өз міндетін адал атқаруы керек. Нанын адал еңбекпен табуы керек", - деп атап көрсетті президент. Осы қағиданы басшылыққа ала отырып, Шәкәрім атындағы гимназияда тәрбие жұмысының жоспарына сәйкес Еңбек күні қарсаңында «СЕНІҢ ТАҢДАУЫҢ» еңбек сабағы өткізілді. Бұндай ерекше сабағымыздың құрметті қонағы - ардагер педагог, көп жыл бойы білім ордамызда жеткіншек жанашыры болып, әлеуметтік педагог қызметін абыроймен атқарған, Математика пәнінің мұғалімі болған Ким Эльза Андреевна төрімізден орын алды. Эльза Андреевна балалардың сұрақтарына жауап беріп, қызығы мен қасиеті мол педагогикалық жолы мен еңбекке араласуы жайлы әңгімелеп, Шәкәрім жастарының назарын еңбектің абыройы мен адалдығына аударды. Әрине, өзі педагог болғандықтан жалпы ұстаздың тәлім-тәрбие берудегі рөлінің маңызын ашып берді. Өзіндік тұлғалық ерекшеліктерінің бірі – нақты ғылым маманы болсада лирикаға жақындығын, поэзияны сүйіп оқитынын жеткізді. Жеткіншектер үшін ең әсерлісі - Шығыс шайыры Омар Хайямның ғибратлы поэзиясын жатқа оқығаны, Шәкәрім бабамыздың математикалық нақыштағы әдеби мұрасына шолу жасағандығы.