ЖАҢА ОҚУ ЖЫЛЫНА ЖАҢА ЖІГЕРМЕН!
Тамылжыған тамыз туысымен ұстаздар қауымы жаңа оқу жылына ерекше жігерленіп, құлшынып кірісетінін - басқа мамандықтарға қарағанда ел ертеңін, ұлт болашағын тәрбиелеп оқытуға деген жауапершіліктің көрінісі дер едім.
Мектеп табалдырығын алғаш рет, именіп аттаған балдырған шақтан, оң-солын таныған бозбала, бойжеткен шағына дейін кемелдендіріп, жетілдіретін ұстаздар еңбегі ұшан-теңіз. Бар білгенін, көрген-түйгенін жас өркенді кемел келешекке жетелеу жолына сарп ететін сынып жетекшісінің еңбегі бір төбе! Ол сыныбындағы әр баланың жүрегінен өзіне лайық орын алып, өзінің жұдырықтай жүрегіне сыныптағы бар баланы сыйдыратын сынып жетекшісінің тұлғасы - бүгінгі күннің және болашақтың басты кейіпкері. Осыған орай Қарағанды қаласы, Шәкәрім атындағы гимназияда жаңа оқу жылына бағытталған жаңашылдық қағидалары мен білім ордамызға лайық тың жоспарлар мен бағыт-бағдарларды айқындау мақсатында сынып жетекшілері Әдістемелік бірлестігінің алғашқы отырысын өткіздім.
Күн тәртібіндегі мәселелерді талқылау барысында басымдылыққа ие болған ой-пікірлер – бала жанын түсіну, бала жүрегіне жол табу, қалған мәселелер осылардың айналысында ғой.
Сонымен қатар, қадірлі де қасиетті, (біліп-түсінген адамға) ұлт болашағын қалыптастыратын сынып жетекшісінің салмақты рөлі туралы жаңадан тағайындалған жас сынып жетекшілеріне жан-жақты түсіндірілді.
Ықылас пен ынтаға толы сынып жетекшілері Әдістемелік бірлестігінің отырысынан түйгендері мол, түсінгендері зор деп бағалаймын.
Барша сынып жетекшілеріне жаңа оқу жылында жаңа Қазақстан құру жолында ел ертеңің тәрбиелеуде қажымас қайрат, жігерлі жетістіктер тілеймін!
Еліміз аман, жұртымыз тыныш болып, мемлекетіміздің беделі асқақтай берсін!
