Желтоқсанның тоғызы күні Қарағанды— Көкшетау—Қостанай—Петропавл шаһарлары ZOOM платформасы арқылы «Тәуелсіз елімнің еркін жолы» деп аталатын телекөпір  орнатып, ел тәуелсіздігінің 30 жылдығын тілге тиек етті. Бұл ауқымды жиын қалалық білім бөлімінің ұйымдастыруымен, қазақ тілі мен әдебиеті пәні әдіскері Айгүл Еркінқызының бастамасымен Абай атындағы гимназияда өткізілді. Жоғарыда аталған қалалардағы 30 жылда жеткен жетістіктер, ұстаздар қауымының тәуелсіздікке сіңірген сүбелі еңбегі, түрлі құндылықтардың салтанат құруы, жас ұрпақтың өскен өресі мен бағындарған белесі телекөпір барысында түрлі форматта көпшілікке ұсынылды. Аталмыш шараға біздің Шәкәрім атындағы гимназия ұстаздары мен оқушылары да қатысып, жоғары деңгейде өнер көрсетіп, біліктіліктері мен шеберліктерін таныта білді. Қазақ тілі мен әдебиеті пәні мұғалімі, жоғары санатты ұстаз Кубекова Құралай Төлепбергеновна жиын барысында сөз сөйлеп, шәкірті Шнитко Илья домбырада күмбірлете күй орындады. Қазақ тілі мен әдебиеті пәні мұғалімі Сулейменов Асылбек Муратович те қаламыздың ақын ұстаздарымен бірге тәуелсіздік тойына тарту жасап, жырдан шашу шашты. Арқа жұртының беделін бір көтеріп тастаған бұл шараға тәуелсіздікпен түйдей құрдас қаламыздың 30 жасқа келген қазақ тілі мен әдебиеті ұстаздары қатысып, үлкен үлес қосты. Шәкәрім гимназиясынан барған біздің ұстаздар мен оқушыларымыз мерейлері үстем болып зор әсермен оралды.