ГИМНАЗИЯ ПРЕЗИДЕНТЕРІНІҢ РИЯСЫЗ ҚЫЗМЕТІ - НАҒЫЗ КӨШБАСШЫЛАР МЕКТЕБІ
Көшбасшы тұлға қашанда қоғам мүддесіне нұқсан келмейтін, келісті, пайдалы шешім шығаруға қабілетті, беделі зор тұлға. Əрине, көшбасшы тұлға қоғам өмірінде өте белсенді, жаңашылдыққа бейім болады. Осындай белсенді, өзіндік азаматтық позициясы бар, жаңашыл тұлғаны мектеп қабырғасынан тəрбиелеп, баптау - заманауи тəрбие мен білім беру үдерісінің басты мұраты. "АСЫЛ ТАСТАН, АҚЫЛ ЖАСТАН" деген актуалды қағидаға сүйеніп, еліміздің білім ордаларында оқушы жастардың Өзін-өзі басқару үдерісі жылдан-жылға дамып, өзіне тəн орны мен рөлін айқындай түсуде. Заманауи демократиялық талаптарды ұстанатын, алдыңғы қатарлы оқушы жастардың басын қосқан бірден бір басқару институты - Өзін-өзі басқару органы Қарағанды қаласы, 93 гимназияда да көп жылдар көлемінде оң нəтижесін беріп келеді. Мемлекеттік басқару органдарында білім ордамыздан түлеп ұшқан бірнеше тамаша көшбасшылар плеядасы қалыптасып үлгерген. Биылғы оқу жылында да дəстүрге берік, пандемия жағдайында да жол тауып оқу жылының басында онлайн түрде сайлау өткізілді, гимназия Парламентінің Президенті сайланды. Осы бастан гимназия Парламентінде ел болашағына ауқымды үлес қосатын белсенді жас азаматтардың басын қосқан, нағыз көшбасшыларды шыңдайтын қүрылым қалыптасты. Еңселі ел ертеңі - бүгінгі көшбасшы жастар қазірден бастап қоғамның елеулі істеріне араласып, жүрек қалауларымен мұқтаж жандарға көмек қолдарын созады. Жастық жалынмен, риясыз сезіммен атқарылған істері елімізге пайдасын тигізіп жатқанына марқайып, əрі қарай елі мен жеріне қызмет етуге дайын жас көшбасшыларға игі тілектер жолдаймыз! Өз елі мен өз жеріне еңбегін сіңіруге дайын көшбасшылар біздің гимназиядан тəлім алады, біздің гимназиядан қияға самғайды. Қанаттарың талмасын, байрақты елдің қырандары!
