ҰЛТТЫҚ КИІМ - АСЫЛ ҚАЗЫНА

#менұлттықкиімменмақтанамын челленджі

Əр ұлттың ерекшілігін білдіретін көп асыл қазыналарының бірі - ұлттық киімі. Халық ішінде "ұлттық киім - ұлтымыздың айнасы" деген тегеуірінді сөз бар ғой. Ата-бабаларымыз бағзы заманнан əсем киіну мен зерлі бұйымдарды тағу білгені де бəрімізге аян. Сан ғасырлар қойнауынан бізге дейін жеткен ұлттық киім кию, зерлі əшекейлер тағу мəдениеті қазіргі заманда өте актуалды мəселе. Сондықтан ұлттық құндылықтарды, ұлтымыздың рухани мұрасы, асыл қазынасы - ұлтымызға тəн киім үлгілерін дəріптеп, өскелең ұрпаққа сəн-салтанатымен, мəн-мағынасымен  түсіндіріп жеткізу, табыстау - ұлттық тəрбиенің басты қасиетті мұраты. Ұлттық киім үлгілері жас жеткіншектер бойына ұлттық құндылыққа деген құштарлық пен мақтаныш сезімдерін оятатын, ұлтымыздың, мəдениетіміздің бет бейнесін көрсететін ғажайып тəрбие құралы деп таныған жөн. Ұлттық киімдеріміз сыртқы сымбатымен, көз тартарлық əсемдігімен, терең дүниетанымды білдіретін ою-өрнегімен халқымыздың эстетикасын, философиясын, бай мəдени мұрасын паш етеді. Осындай биік асыл мұратты алға қойған Қарағанды қаласы, Шəкəрім атындағы 93 гимназияның педагогтары мен оқушылары Ұлыстың Ұлы күні қарсаңында ұлттық киімдерді мақтаныш сезіммен киіп, ұлттық  болмысымыздың асылдығын, бірегейлігін көрсете білді. Əр педагог, əр гимназия жұмысшысы, əр оқушы келбетінен "ең əдемі киім - ұлтымыздың киімі" деген пайымды көруге болады.

Осы ойды жалғастыру үшін "Мен ұлттық киіммен мақтанамын" челленджін N 3 гимназиядағы əріптестерімізге жолдаймыз. Рухты көтеріп, ізгілікке тəрбиелейтін ұлттық құндылығымыз əрі қарай мəңгілік дəріптеле берсін!