Қарағанды қаласы, «№93 гимназия» КММ өткізген «АДАМДЫҚ БОРЫШЫҢ – ХАЛҚЫҢА ЕҢБЕК ҚЫЛ!» тақырыбындағы оқушылардың ғылыми-танымдық конференциясы «ШӘКӘРІМ ФИЛОСОФИЯСЫНДАҒЫ ИМАНДЫЛЫҚ МӘСЕЛЕСІ» секция жұмысы туралы (2-бағыт) Сан қырлы шығармашылығында даналығы мен қоса имандылығы басым, шынардай биік тұлға Шәкәрім Құдайбердіұлы шығармашылығына арналған «Адамдық борышың – халқыңа еңбек қыл» тақырыбындағы оқушылардың ғылыми-танымдық конференциясы мәресіне жетті. Іздемпаз, талғампаз жастарымыз ұлы ойшыл шығармашылығына терең бойлап, жан-жақты зерттеді, әрқайсысы өзінше ізденді. Конференцияның ашылуынан соң, білім ордамыздың директоры Ахметова Аягүл Нұрабайқызынан, еліміздің бас қаласының, өзіміздің кенді шаһарымыздың ғалымдарынан бата алып, жігерленген жас өрендер әділ қазылық жасаған ұстаздардың шешімімен мәртебесі жоғары пленарлық отырыста ғылыми сайысқа жол бастады. Бұдан бөлек, маңызы зор көпшілік болып ғылыми ізденістерін ортаға салатын секциялық отырыс жұмысы да басталып кетті. Актуалды мәселелер көтерген жас ғалымдарымыз құнды ойларын ортаға салуға, ізденіс нәтижелерін қорғауға бел буып, бекініп келгені көрініп тұрды. Жалпы жас өрендер кемеңгер тұлға Шәкәрімге қатысты саф алтындай тың ойларын 5 секцияда қорғады. Оның 3 қазақ тілінде, жарияланған конференция Ережесіне сай бағыттар бойынша бөлінді. Орыс тілінде 2 секция жұмыс істеді, олар, жалпы «Филология» және «Тарих» бағыттарын қамтыды. Осыған қарап, оқушылардың ұлы ойшылдың қаншама шығармашылық қырларын зерттегенін аңғаруға болады. Жалпы алғанда, конференция тақырыбы бойынша ең көп ғылыми ізденістер келіп түскен бағыт – екінші бағыт «Шәкәрім философиясындағы имандылық мәселесі». Бұл бағытта жастар ойшыл мұраларындағы имандылық, адамгершілік, тәрбие, парасаттылық сынды жалпыадамзаттық құндылықтарға бет бұрды, ойларын зерделеді, ерекше пәлсапасына үңілді. Тақырыбы ауқымды, қазіргі өмір шындығында жалпыға жақын болғандықтан болар, бұл бағытты таңдаған жастар көбірек болып, қазылар шешімімен жалпы саны 16 оқушы қатысты. Бұл секция жұмысына модерация жасаған гимназиямыздың «Қазақ тілі және әдебиеті» пәндерінің мұғалімі Сүлейменов Асылбек Мұратұлы және әділ қазылар алқасының төрайымы, Қарағанды мемлекеттік университетінің доценті, ф.ғ.к., Төлеубаева Кәмшат Аманбайқызы қазылық жасап, жас ғалымдар жұмысын жандандыра түсті. Ақыл-ой тартысқа түскен бұл бәсекеде жоғары мәртебелі қазылар қарарымен нәтижесінде келесі жастар оқ бойы озып шықты: 1-орынды Абишева Аяла, Қарағанды қаласы, «№93 гимназия» КММ оқушысы; 2-орынды Айтамбетова Рыскелді, Қарағанды қаласы, КММ ЖББО №53 МЛ оқушысы; Маркен Бағдат, Қарағанды қаласы, «Дарын» мамандандырылған мектеп-интернатының» оқушысы; 3-орынды Ермеков Санжар, Қарағанды қаласы, № 82 ЖББОМ оқушысы; Бекен Айым, Қарағанды қаласы, Қарағанды қаласы, М.Жұмабаев атындағы №39 гимназия оқушысы; Макишова Талшын, Қарағанды қаласы, «№103 мектеп-лицейі» КММ оқушысы; Курманкулов Нұргелді, Қарағанды қаласы, «№23 ЖББОМ» КММ оқушысы; Берікбол Әйгерім, Қарағанды қаласы, Қарағанды қаласы №59 ЖББОМ КММ оқушысы; Павлик Олжас, Балқаш қаласы «Әлихан Бөкейханов атындағы №15 мектеп-лицейі» КММ оқушысы. Жігері жалындаған жастарымыз ғылым жолында сүрінбей биіктерді бағындыра берсін!