ДАНАЛЫҚ РУХЫ БАСЫМ ШƏКƏРІМ ҚҰДАЙБЕРДІҰЛЫ: КЕЛ, ЖАСТАР, БІЗ БІР ТҮРЛІ ЖОЛ ТАБАЛЫҚ, БІР БІЛІМДІ ДАНЫШПАН ЖАН ТАБАЛЫҚ! Қашанда кемеңгер, данышпан тұлғалар артындағы қара орман еліне рух беріп, асқақтата түсетіні бар емес пе... Осындай, даналығы мен даралығы басым ұлы ойшыл Шəкəрім, сыршыл Шəкəрім, ақын Шəкəрім, сазгер Шəкəрім бүгін өресі биік, арманы асқақ білім ордамызда, Қарағанды қаласы, 93 гимназияда өткен оқушылардың "АДАМДЫҚ БОРЫШЫҢ - ХАЛҚЫҢА ЕҢБЕК ҚЫЛ!" тақырыбындағы ғылыми-танымдық конференциясына арқау болды, саф алтындай таза ойдың діңгегі болды, асылы мен ақылын ортаға салған жас өрендер салатын соқпақтың қазығы болды. Жан-жақтан жиналған жас өрендер данышпан Шəкəрімнің мол əдеби жəне мəдени мұрасының сан алуан қырларын шебер ұстадай зерледі, рухани азық болатын тұстарына ойып сөзден өрнек салды. Іздемпаз, талғампаз жастарымыз дара Шəкəрімнің даналық рухын зерделеп, зер белбеудей бойына шақтап сан қырлы ғылыми-танымдық концепттер ұсынды. Ұсынды да, ойшылдың тереңге бойлаған пəлсапасының астарын ұғынды. Кемеңгер ақын өзі үміт артқан жас буынға арнаған мына өлең жолдары замана асуларынан асып жас өрендер санасына жеткендей: Көрмесе де көзімді Білмесе де өзімді, Кейінгі жастар қабылдар Айтылған түзу сөзімді. Сыршыл ақынның "айтылған түзу сөзі" бүгін көп жастардың қалың халық ортасына шығып, сөз бастауына арқау болған жоқ па... Ұлаңғайыр Ұлы даламыздың бірнеше өңірінен, бір шеті өнер мен мəдениетке, кəсіп пен əдебиетке зор үлес қосқан жарық шоқжұлдыздарды берген, шынардай тұлғасы биік Шəкəрім туған қасиетті Семей жерінен, кенді де керуенді Балқаштан, нұры тасыған зиялылар шыққан нұрлы Нұра елінен, қаламыздың барлық білім ордаларынан бəйгеге дана Шəкəрім мұрасын зерттеген жүзден астам ғылыми-танымдық ізденістер түсіпті. Осындай, Шəкəрім өзі дəріптеген гуманистік идеяға бай, гуманитарлық бағыттағы зияткерлер додасын болашақ зиялылар қауымын қалыптастырудың алғашқы баспалдағы болған бұл конференцияны білім ордамыздың директоры, АХМЕТОВА АЯГҮЛ НҰРАБАЙҚЫЗЫ ашып, кемеңгер, дана Шəкəрім шығармашылығының көкжиегін көрсетті, ақжол тіледі. Əрі қарай модератор міндетін тамаша атқарып отырған гнимназиямыздың ұстазы СҮЛЕЙМЕНОВ АСЫЛБЕК МҰРАТҰЛЫ ғылымға бет бұрған жас буынды жігерлендіріп, қайрат беру мақсатында Республикамыздың белді-беделді ғалымдарына сөз кезегін ұсынды. Еуразия ұлттық университетінің профессоры, ф.ғ. д., алаштанушы, ЖҰМАҒҰЛОВ САҒЫНБАЙ БОТПАЙҰЛЫ, Қарағанды мемлекеттік университетінің доценті, ф.ғ.к. ТӨЛЕУБАЕВА КƏМШАТ АМАНБАЙҚЫЗЫ, Еуразия ұлттық университетінің доценті, ф.ғ.к.АЮПОВА ГҮЛБАҒИРА ҚАЙЫРБЕКҚЫЗЫ сынды ғалымдар да өздерінің ізбасарларының алғашқы қадамдарын құптап, игі тілектерін жолдады. Сонымен қатар, облыстық оқу-əдістемелік орталығының бас маманы мен қалалық білім бөлімінің əдіскері ғылымға бет бұрған жастар ісіне оң баға беріп, биік жетістіктерге жетуге тілек білдірді, білім мен ғылымды игеруге шақырды. Конференция регламентіне сəйкес алғашқы қадам - пленарлық отырыста еліміздің еңсесін асқақтатам деп келген алты жас өреніміз ізденістерінің нəтижесін ортаға салды. Ғылымды дəріптеп биікке ұмтылған жастарымыз: АБИШЕВА АЯЛА, 93 гимназия Қарағанды қаласы АЙТҚАЗИН Д. N15 Əлихан Бөкейханов атындағы мектеп-лицей, Балқаш қаласы ЖАҢАБЕРГЕН А. N20 Жалпы білім беріп дамыта оқытатын мектеп, ШҚО, Семей қаласы ЖҮНІСОВА СƏНИЯ, С.Талжанов атындағы Ақмешіт лрта мектебі, Нұра ауданы, Қарағанды облысы КУБЕЕВ АРСЕН, 93 гимназич, Қарағанды қаласы БЕРІКБОЛ Ə. N59 ЖББОМ, Қарағанды қаласы. Өресі биік конференцияның пленарлық отырысына қатысқан əр оқушының ізденген тақырыбы маңызды əрі құнды екенін дəлелдеп шыққан спикерлер жүлделі орындардан көріне білді. Ортаға салған ғылыми ізденістерін жас ғалымдар конференциямыздың секциялық отырыстарында да зияткерлік танытып абыроймен қорғап шықты. Қарумен емес, ілім-біліммен айқасқан бұл тұста 5 секцияда(қазақ тілінде 3 бағыт бойынша, орыс тілінле 2 бағыт бойынша) əр спикер өз білім ордасының намысын биік дəрежеде қорғай білді, ізденіс нəтижелерін көрсете білді. Даналық рухы басым Шəкəрімнің шығармашылық мұрасы арқау болған оқушы жастардың ғылыми-танымдық конференциясынан алған мол ғылыми тəжірибе білім-ғылым жолында, өмірдің иірімі мен соқпақтарында мызғымас рухани азық болатынына сенімдіміз! Алға, қазақ жастары!