"АПАТСЫЗ ƏЛЕМ" Бүгін адамзат алдында жаһандық проблема тұрғаны баршаға аян. Ол - экологиялық, техногендік апаттар. Жер-ананы сақтау, қорғау, апаттардың қайсын болмасын болдырмау - басты міндет. Осыдан 34 жыл бұрын орын алған Чернобыль апатын өскелең ұрпақ көрген жоқ, көрмей-ақ қойсын! Бірақ, ең маңыздысы, дұрыс бағытта сабақ алып, болашаққа аманаттаса екен дейміз. Осы тақырып бойынша қалам тербеп, өзінің ой-толғауымен бөліскен Қарағанды қаласы 93 гимназияның 8А сынып оқушысы АБИШЕВА АЯЛАНЫҢ эссесін назарларыңызға ұсынамыз. "МИР БЕЗ АТОМНЫХ КАТАСТРОФ" Уроки Чернобыльской катастрофы еще долго будут отзываться эхом в сердцах многих поколений. И сегодня нам важно, как поколение, которое, к счастью, не видело это, извлечет урок и примет все меры, чтобы сохранить единственную, хрупкую, родную Землю! Об этом эссе ученицы 8А класса No 93 гимназии г. Караганды, АБИШЕВОЙ АЯЛЫ. Люди мира! На минуту задумайтесь! Эссе АПАТСЫЗ ƏЛЕМ Ұқсайды бар тыныштық жер бетінде Ұйқыдағы сәбидің келбетіне (Мұқағали Мақатаев) Тарихтың қатпарлы беттерін ақтарып қарасаңыз, адамзат баласының берекесін бес тиын еткен, болашағын күңгірт қылып, тыныштығын теңселткен кеселдердің барлығы түрлі апаттардың кесірінен болып жатады. Апаттың айтып келмейтіні түсінікті әрине, бірақ қарекетсіз, қамсыз,қауіпсіз жата беру де адамның өзіне жау болуы әбден мүмкін. Биыл 1986 жылы болған Чернобыль атом электр станциясындағы қайғылы апатқа 34 жыл толып отыр. Бұл апаттың адамзат тарихындағы үлкен орны толмас жағдай екендігін білеміз. Апат салдарынан улы түтінге тұншыққан мыңдаған адам ажал құшты, қаншама жерге улы түтін тарап, халықтың тыныштығы бұзылды, қаншама жандар тағдыр тәлкегіне ұшырады, мемлекет шығынға белшеден батты. Біздің елімізден де апатты залалсыздандыруға көптеген азаматтар тартылғанын тарихтан оқып білдік. Осыншама қасіреттің барлығы адамның қателігінен болғанын ескерсек, бүгінгі заманда бұл жағдайлар бізге үлкен сабақ болуы тиіс деп ойлаймын. Менің ойымша, әлемдегі болып жатқан қаншалаған апаттардың барлығын адамзат өзі жасап келеді. Өркениет жолында ілгерілейміз деп, өрескел қателіктерге ұрынып жатады. Апатқа байланысты түрлі мысал айтуға болады, алысқа бармай-ақ өз еліміздегі орын алған жағдайларға мән берсек, Қазақстанда жыл сайын бір ғана су тасқынының өзінен 300 мыңға жуық адам жапа шегеді екен. Бұл апаттың да артында адам қателігі тұрғанын аңғару қиын емес. Адамзаттың Табиғатқа қиянат жасау мәселесі бүгінгі күні өте ауқымды, кезек күттірмейтін мәселе деп ойлаймын. Себебі қазір әлем табиғат ананың қадірін ұмытқалы қашан... Менің пікірімше, табиғатқа жасалған қиянат – өзіңе жасалған қиянат болуы керек. Әрбір адам баласы осылай ұғынбайынша, апаттар тоқтамайды. Табиғат біздің өміріміз екенін естен шығарып, ауаны ластап болдық, су тіршілік көзі екенін ұмытып, су ішкен құдыққа түкіріп келеміз... Экология мәселесін қазір бүкіл әлем болып қолға алу керекпіз деп ойлаймын. Жасыл энергияны жандандырып, әлемдегі апаттардың алдын алсақ қана, адамдық мүдденің биігінен табыламыз деп есептеймін. Апатсыз әлемді жасау – адамзаттың өз қолында, ол үшін алдымен әр адам жаратылыс құндылықтарының бағасын білуді алдыңғы кезекке шығаруы тиіс деп қорытындылаймын. Әлемдегі апаттар – адамдардың жаратылғандағы миссиясының бұзылуынан болады деуге болады. Сондықтан бір сәт ойланайық, адамзат! Сынақтардан сабақ ала отырып, өткенге салауат айтып, келешекке үмітпен қарайық, құрметті оқырман! Авторы: «№93 гимназия» КММ 8а сынып оқушысы Абишева Аяла Жетекшісі; «Қазақ тілі және әдебиет» пәндерігің мұғалімі Сүлейменов Асылбек Мұратұлы