Семинарға келген қонақтарды тіркеу сағат 9.00-ден 10.00-ге дейін жалғасты. Семинарға келген мұғалімдерге жақсы көңіл-күй сыйлау мақсатында «Рухани жаңғыру» бағдарламасының эмблемасын геометриялық фигуралардан бірлесе отыра құрастыру ұсынылды. Мұғалімдер өздеріне ұнаған фигураларды алып плакатқа жабыстырып, әр фигураның артында семинар қатысушыларына арналған тілектерді өздеріне алып қалды. Осы тілектер семинардың қорытындысы ретінде өткен рефлексияда жалғасын тапты.

2019 жылдың 13 мамырында Қарағанды қаласы «№93 гимназия» КММ  Қарағанды облысы білім беруді дамытудың оқу-әдістемелік орталығының жоспарына  сай қазақ тілі мен әдебиеті пәні кафедрасының ұйымдастыруымен «Шығармашылық жұмыстар арқылы оқушылардың функционалдық сауаттылығын дамыту» тақырыбында облыстық семинар өткізілді. Семинарға Қарағанды облысы мен Қарағанды қаласы мектептерінен барлығы 56 мұғалім қатысты. Семинардың ашылу салтанатында «№ 93 гимназия» директоры Ахметова А.Н. сөз сөйлеп, келген қонақтарды қарсы алды. Директордың оқу ісі жөніндегі орынбасары Кубекова Қ.Т. семинардың мақсат-міндеттерімен, барысымен таныстырды.

13.05.2019 жылы өткен облыстық семинар барысында 6 «А» сыныбында «Жаңа технологиялар», 9 «А» сыныбында «Мұхтар Әуезов – ұлттың ұлы жазушысы», 11 «А» сыныбында «Н.Ә.Назарбаевтың «Тәуелсіздік толғауы» тақырыптарында ашық сабақтар көрсетілді. Ашық сабақ өткізген пән мұғалімдері: Сейтенова Г.Ж., Кулашева А.К., Кусаинова Ә.Қ.

Сыныптан тыс жұмыс ретінде Сәкен Сейфуллиннің 125 жылдық мерейтойына арналған   «Сұңқар ғұмыр»  тақырыбындағы сахналық қойылым көрсетілді. Қойылымға 7 «А» сыныбы мен 9 «А» сыныбының оқушылары қатысты. Қойылымды дайындаған Сулейменов Асылбек Муратович. Қойылым келген қонақтар тарапынан жоғары бағаға ие болды.

Семинардың екінші бөлімін «Арқадан құлдилаған ақбөкен жыр» деп аталады. Семинардың осы бөлімінде Қазақстан Республикасының еңбек сіңірген қайраткері, «Дарын» сыйлығының лауреаты, айтыскер ақын Аманжол Әлтаевпен кездесу өткізілді. Кездесуге Қарағанды облысы білім беруді дамытудың оқу-әдістемелік орталығы директорының  мектепке дейінгі және жалпы орта білімді дамыту бойынша  орынбасары Әбдікерова Бақытгүл Химальдинқызы, Қарағанды мемлекеттік университетінің профессоры, филология ғылымдарының докторы, айтыскер ақын Асанов Қойлыбай Дәулетқанұлы мен Е.А.Бөкетов атындағы Қарағанды мемлекеттік университетінің доценті, филология ғылымдарының кандидаты, айтыскер ақын Жұмағұлов Айтбай Ботпайұлы қонаққа шақырылды.  Кездесу барысында сыр-сұхбат жүргізілді. Оқушылар, семинарға қатысушы мұғалімдер ойларында жүрген сұрақтарын қойып, толық жауап алды деп ойлаймыз. Кездесуге келген «№ 93 гимназия» оқушылары өздерінің Аманжол ағаға арнаған арнауларын оқыды.

Екінші бөлімнің соңында Аманжол Әлтаев шығармашылығына бағытталған ғылыми жобалар байқауы өткізілді. Байқауға «№93 гимназия» КММ, «№ 92 гимназия» КММ, № 57 МЛ, № 68 МИ оқушылары қатысты. І жүлделі орынға № 92 гимназия оқушысы Қауаз Нұрайым ие болса, ІІ және ІІІ орындарға № 57 мектеп-лицей мен 68 МИ оқушылары Әнуар Айдана мен Серикова Дизьназ ие болды. Кездесу соңында семинар қонағы Аманжол Әлтаев ғылыми жобалар сайысына қатысқан оқушыларға және өзіне арнау арнап өлең шығарған оқушыларға  естелік  ретінде кітаптарын сыйға тартты.

Семинардың үшінші бөлімі «Функционалдық сауаттылық – сапалы білім берудің кепілі» деп аталды. Аталған тақырып бойынша дөңгелек үстел өткізілді. Дөңгелек үстелді дайындаған  ұстаздар: Сейтенова Г.Ж., Кулашева А.К. Сонымен қатар функционалдық сауаттылыққа бағатталған көрме ұйымдастырылды. Жауапты мұғалім: Аубакирова Ш.С.