24 наурыз - Дүниежүзілік туберкулезбен күрес күні

   Туберкулез емделетін және алдын алуға болатын ауру. 2014 жылдың мамырында Дүниежүзілік денсаулық сақтау ұйымының ассамблеясы қабылданған ДДҰ-ның туберкулезбен күрес жөніндегі стратегиясы  - туберкулез ауруына шалдыққандар  мен өлім-жітім көрсеткішін азайтып, індеттен келетін апатты шығысты айтарлықтай төмендете отырып мемлекеттерге туберкулез індетін жоюға мүмкіндік беретін тұжырымдама. Оған ғаламдық ауқым бойынша келесі нысаналы көрсеткіштер кіреді: 2015-2030 жылдар аралығында туберкулезден болатын өлім-жітімді 90%-ға азайту, жаңа деректер санын 80%-ға қысқартуға және туберкулез салдарынан бірде-бір отбасының жоқшылық тауқыметін тартпауына  бағытталған шаралар.

Соңғы жылдары елімізде туберкулезге қарсы жүргізіліп жатқан шаралардың нәтижесінде халықтың туберкулезге шалдыққандар саны мен өлім-жітім көрсеткішінің төмендетуге қол жеткізілді.

  Туберкулезге қарсы ұлттық орталықтың алдын ала мәліметтері бойынша 2014-2015 жылдың қорытындысы бойынша елде 100 мың халыққа шаққанда ауру көрсеткіші 66,4-тен 58,5-ге дейін 11,9%-ға, өлім-жітім 4,9-дан 3,8-ге (22,4%-ға) төмендегені байқалады. Індет көрсеткішінің азаюы халықтың барлық жастағы топтарда байқалады.

2015 жылы елде балалардың аурушаңдылығы 2014 жылы 7,7-ге қарағанда  6,8-ді құрап 11,7%-ға төмендеген. Манту 2ТЕ туберкулин сынамасын жасау балалардан туберкулезді анықтаудың маңызды әдісі болып табылады. Бұл - ағзаның туберкулез бактериясын жұқтырғанын анықтауда жетекші әдіс және ол баланың туберкулез жұқтырғанын ерте анықтауға мүмкіндік береді.

Республика бойынша туберкулезбен аурушаңдылық жағдайының жақсаруына қарамастан туберкулездің алдын алу шаралары жөнінде ақпараттылыққа халықтың назарын аударту қажет.

Республика өңірлерінде 2016 жылдың 24 ақпаны мен 24 наурыз аралығында халыққа туберкулездің алғашқы белгілерін, дер кезінде медициналық көмекке жүгінудің маңыздылығын насихаттау; профилактикалық шаралар және уақытында емделудің тиімділігі туралы хабардарлығын арттыру; МСАК дәрігерлерінің туберкулезді ерте диагностикалау мен профилактикалық шараларды күшейтуге қатысты сақтықты арттыру; жұмыс беруші мен қызметкердің өз денсаулықтарына ортақ жауапкершіліктерін қалыптастыру, салауатты өмір салтын ұстану мен профилактикалық тексеруден уақытылы өтуге жағдай жасау мақсатында Дүниежүзілік туберкулезбен күрес күніне (24 наурыз) орайластырылған туберкулездің алдын алу жөнінде айлық өткізіледі.

Туберкулезді дер кезінде анықтау – нәтижелі  және тиімді емделудің кепілі.