Ана тілімізді құрметтей білейік

 

      Әр ұлттың  ана тілі –  халықтың өткен ұрпағын, қазіргі және келешек ұрпағын тарихи бір тұтастыққа, мызғымас бірлікке, ажырамас туыстыққа мәңгілік біріктіретін ең сенімді құрал екені даусыз.

     Тек  ана тіліміз арқылы ғана халқымызды, Отанымызды танып білеміз және халықтың өшпес  рухының сарқылмас бұлағы да сонда жатыр. Ел- жұртымыз, туған жеріміз, оның өзен-көлдері,  тау-қыраттары мен топырағы, тіпті кез-келген табиғи құбылыстары тек қана ана тіліміз арқылы ғана қабылданып, соларға деген перезенттік махаббатымыз бен сүйіспеншілігімізді тек ана тіліміз арқылы ғана  жеткізгенімізде оның қасиетті, терең мағыналы болатыны анық. Сондықтан, қай халықтың, қай ұлттың болса да қоғамдық, табиғи өсіп-өркендеу жолында шыға  алған биігі  мәңгілік болып тек қана ана тілінде сақталып отырады. 

     Қай халықтың болса да басынан өткен дәуірлері, қилы- қилы  кезеңдері ана тілінде із қалдырмай өте алмайтындықтан, қазақ тілі ғасырлар бойы жасала да береді, жасара да береді, себебі,  қазақ тілі дегеніміз - сол тілді жасаған, жасап келе жатқан халықтың  мәңгілігінің мәңгілік  мәселесі деп қазақтың көрнекті ғалым-жазушысы Ғабит Мүсірепов айта келіп, ол ана тілін тек өгей ұлдары ғана менсінбейді, өгей ұлдары ғана аяққа басады деген болатын. Қазақ тілін үйрену –  ұлы іс екенін бұдан да ерте кезде ұлтын сүйген оқымысты-ғалымдар   айтып кеткен. 

    Бүгінгі күні әркім өз ана тілін біліп, анасынан туа үйренген тілімен сөйлеуге тырысуы – кез-келген намысы бар, ұлтын сүйер азаматтар үшін ең қажетті қасиеттердің бірі және ол қазіргі уақыт талабы дегім келеді.  Қазақ тілінің мәні мен маңызын,  қажетілігін  ақындар Тұманбай Молдағалиевтың :

                                     ...Басқа тілдің бәрін біл,

                                       Өз тіліңді құрметте.

және  Сұлтанмахмұт Торайғыровтың:

                                      Сүйемін туған тілді – анам тілін,

                                      Бесікте жақанымда-ақ берген білім,

                                      Шыр етіп жерге түскен минутымнан,

                                      Құлағыма сіңірген таныс үнін 

деген өлең жолдарымен сипаттап, қысқаша қорытынды жасауға болады. 

 

 

Мәуия  Ахметбекова, 

№102 мектеп-гимназиясының география мұғалімі