Халқымыздың ұлы батыры Б.Момышұлы былай деген екен, «Ұстаздық-ұлы құрмет». Себебі, ұрпақтарды ұстаз тәрбиелейді. Болашақтың басшысын да, данасын да, ғалымын да, еңбекқор егіншісін де, кеншісінде ұстаз өсіреді. Өмірге ұрпақ берген аналарды қандай ардақтасаң, сол ұрпақты тәрбиелейтін ұстаздарды ардақтауға міндеттіміз.

Ұстаздар күніне орай «Өнегелі өмір» жобасы аясында білім шаңырағында «Мектептің жаны-мұғалім» атты мерекелік  кездесу бағдарламасы ұйымдастырылды.

«Биік шыңның басына шыққан адам алды-артын, оң мен солын, яғни екі жағын түгел көреді.Етекте тұрған адам екі жағын зорға көреді.Ауырда тұрған адам бір жағын әрең көреді. Ал көпті көріп, көнені тоздырған адам сол биік шыңның басында тұрған адаммен пара-пар емес пе?Үлкенге жолды берсе, артық болмас деймін!» деген екен Төле би бабамыз. Кездесуге келген ұлағатты ұстаздарымыз химия пәнінің мұғалімі, педагог-зерттеуші, «Білім саласына қосқан зор үлесі үшін» атты медаль иегері Искакова Замзагуль Бахтыбаевна, биология және өзін-өзі тану пәндерінің мұғалімі, педагог-зерттеуші, қалалық, облыстық және Республикалық көлемде марапаттар иегері, ҚР «Ғылым және білім министрлігінің» Құрмет Грамотасының иегері –Илимбаева Гулайман Батталовна, орыс тілі мен әдебиеті пәні мұғалімі, педагог-зерттеуші, қалалық, облыстық және Республикалық көлемде марапаттар иегері, «Ана жүрегі» медалінің иегері-Макулбаева Жамал Калиевна, бастауыш сынып мұғалімі, қалалық, облыстық және Республикалық көлемде марапаттар иегері, «Педагог саласының үздігі» медалінің иегері-Турмагамбетова Зайдагуль Уменовналар осынау қиындықтар мен қызықтарға толы еңбек жолдарындағы азды, көпті көргендерімен  бөлісе отырып, өскелең ұрпаққа, оның ішінде алдарында отырған шәкірттеріне деген берер кеңестерімен бөлісе отырып, өздерінің бірінші мұғалімдік күндеріне сапарлап қайтты. Тоқсан ауыз сөздің тобықтай түйіні ғылым иесі ғалым да, ел қорғаған батыр да, тілінен бал тамған ақын да, тегеуріні темір балқытқан жұмысшы да, егін салған диқан да, мал бағып терін төккен шопан да, көк күмбезінен әрі өткен ғарышкер де бәрі-бәрі ұстаздан білім, тәлім алған, сондықтан ұлағатты ұстаздар сіздерге бүкіл адам баласы құрметпен бас иеді.