«Мағжан тағылымы-2» ғылыми-практикалық конференциясы

   Екінші желтоқсан  күні М.Жұмабаев атындағы №39 гимназияда ҚР тәуелсіздігінің 20 жылдығы мен Мағжан мектебінің 20 жылдығына арналған аймақтық «Мағжан тағылымы-2» ғылыми-практикалық конференция болып өтті. Конференцияға Қарағанды облысының мұғалімдер білімін жетілдіру және қайта даярлау институтының директоры С.Қонтаев, Қарағанды қаласы білім бөлімінің бастығы Д.Жекебаев, Е.Бөкетов атындағы ҚарМУ ұстаздары, тарих  ғылымдарының докторы Н.Бейсенбекова, филология ғылымдарының кандидаты Ж.Ботбаев, Шымкент қаласы М.Жұмабаев атындағы №39 орта мектеп директоры М.Бейсе қатарлы адамдар қатысты.

ҒПК-ны гимназия директоры Ж.Базыл салтанатты түрде ашып, гимназиядағы оқу-тәрбие ісінің орындалуы туралы айтып өтті. Алқалық мәжілісте жоғарыдағы ұстаздардан басқа Г.Мабиева, Г.Достаева, А.Есенжолова қатарлы ұстаздар өз ойларын ортаға салып, тыңдармандарды ұйытса, гимназиямыздың 4-сынып оқушысы Елнар Жанғазиевтің «Мағжан атам аңсаған азаттық» атты баяндамасы көптің көңілінен шығып, зор ілтипатқа ие болды.

Конференция өз жұмысын бес секция бойынша жалғастырды.

1.     Мағжан тағылымы секциясы;

2.     Қоғамдық-гуманитарлық пәндер секциясы;

3.     Жаратылыстану-политехникалық пәндер секциясы;

4.     Педагогика-психология, өнер секциясы;

5.     Шетел тілдері секциясы.

Әр секция өз жұмысын қорытындылап, ұсыныстарын енгізді. «Мағжан тағылымы-2» ғылыми-практикалық конференциясының соңы Мағжан мектебінің 20жылдық мерейтойына жалғасты.