«Бір ел - бір кітап» республикалық акциясы елімізде 2007 жылдан бастап ҚР Мәдениет және спорт министрлігінің қолдауымен Қазақстан Республикасының Ұлттық Академиялық Кітапханасы мен ҚР кітапханалар қауымдастығының бастамасымен өткізіліп келеді. Акцияның мақсаты – ұлттық әдебиетіміздегі ең үздік туындыларды оқу және насихаттау, оқу ісін ілгерілету, рухани мұрамызды сақтау, сондай-ақ жастарға рухани-адамгершілік және патриоттық тәрбие беруге бағытталған. Сонымен қатар, акция қоғамның отандық әдебиетке, оның ішінде классикаға, қазіргі әдебиет пен поэзияға деген қызығушылығын әрі қарай жоғарылатуына мүмкіндік туғызады. Мектеп кітапханасы 2023 жылы «Бір ел – бір кітап» республикалық акциясы аясында қазақ жазушысы, драматург, қоғам қайраткері Төлен Әбдіктің шығармаларын оқуда жазушының «Қонақтар» әңгімесін оқып, талқылап, сол әңгіме сюжетіне сахналық драма дайындады. Сахналық драмаға мектептің жұмыскерлері, мұғалімдер, оқушылар тартылды. Әңгіменің "Қонақтар" аталуында да сыр бар. Ерғабыл қарияның қара шаңырағына келген өзінің туған ұлы мен немересі емес, оның аман-саулығын біле келген, жүре соққан құдайы қонақ қана. Олардың қария үшін қадірі қонақтық қана. Өз үйіне өзі қонақ болып отырған ұрпақ, шын мәнінде, өте ауыр әрі қасіретті жағдай. Жазушы осынау ғаламдық идеялардың барлығын шағын шығармаға ғана сыйдырып, атауына ерекше мән берген. Пьесаның кейіпкерлері жазушының осынау ғаламдық идеялардың барлығын киелі сахнада көрсете білді. «Оқуға құштар мектеп» мектепішілік акциясының «КІТАПХАНА. ОТБАСЫ. ТЕАТР» атты насихаттау жұмыстары оқу жылында жалғасын табады. Әр оқылған шығарманы талдап, сценарий жазып, киелі сахнада сахналау жоспарымызға кіргізілген. Ендеше, кітап оқып рухани бай болайық, оқырман қауым!?
