Ұлы жеңіске 70 жыл

Мақсаты: Оқушыларды адамгершілікке, Отанын сүюге, оны қорғауға баулу. Отанға деген сүйіспеншілігін арттыру, оларға патриоттық тәрбие бере отырып, өз елін, жерін қастерлейтін саналы да парасатты азамат етіп тәрбиелеу. Өткізілу барысы: 1. Кіріспе 2.  «Қазақстандықтардың соғысқа аттануы»  бейнекөрініс 3. Ұлы Жеңіске мың тағзым! (жеңіс туралы әндер, өлеңдер оқу) 4. Отан үшін от кешкендер (слайд )

6. «Отты жылдар елесің, кітаптан оқып білесің...» (кітап көрмесі) 7. «Бауыржан Момышұлының өз дауысы» бейнекөрініс 8. Қорытынды 1-Жүргізуші: Жеңіс күні 9-мамыр – бүкіл дүниежүзі бойынша үлкен мейрам. Әсіресе, бұл мерекені екінші дүниежүзілік соғыстың бар ауыртпалығын өз мойнымен көтеріп, Отан үшін от кешіп, соғыстың қанға бөккен даласында қайсарлықпен шайқасқан, Жеңістің туын желбіреткен, Ұлы Отан соғысының ардагерлері үшін ерекше мейрам. 2-Жүргізуші: Аз емес зар жылаған, егілген жан, Аз емес өшкен өмір, төгілген қан. Кеудеге зілді қасірет салды соғыс. Қирады талай арман көңілге алған Ұлы Отан соғысына қатысқан: Бауыржан Момышұлы, Мәншүк Мәметова, Әлия Молдағұлова, Мәлік Ғабдуллин, Талғат Бигелдинов т.б.және де өз жерлестеріміз де бар. Ол кісілерге құрметпен бас иеміз. Ал осы бейбіт өмірге жете алмаған, ерлікпен қаза тапқан ағаларымыз бен апаларымыздың рухына бас иіп, еске алайық. Жеңіс туын желбіретуде қан кешіп, кеудесін оққа тосқан боздақтарымызды бір сәт үнсіздікпен еске алайық. (1 мин үнсіздік) 1-Жүргізуші: 1941 жылы 22 маусым күні таң шапағы жаңа ғана арайланып келе жатқан кезде елімізге қауіп төнді. Халқымыз адам айтқысыз қиын – қыстау кезеңге душар болды. Фашистік Германия елімізге опасыздықпен басып кірді. 2-Жүргізуші: Ұлы Отан соғысы басталды. Отанымыздың басына ауыр күндер туды. 1-Жүргізуші: Қазақстанда соғыстың алдында 6, 2 миллион халық тұратын еді. Осы жылдары республикамыздан 1 млн. 196 мың 164 адам қару асынып, майданға аттанды. Республикадан еңбек армиясына 700 мың адам жіберілді. Сонда Қазақстаннан соғыс жылдары әскери комиссариаттары арқылы 1 млн. 900 мыңдай адам сапқа тұрды. 2-Жүргізуші: Иә, кім де болса өз Отанын қорғауға қашанда дайын. Ұлы Отан соғысы туралы толығырақ мәлімет алу үшін бейнекөрініске назар аударыңыздар! 1-Жүргізуші: Бұл жылдары жүрегі Отаным деп соққан әр азамат барынша күресе білді. Әрбір азамат өз Отанына деген антын орындап шықты. Олай болса сұрапыл соғыс және елін, жерін қорғаған майдангерлер туралы өлең жолдарын тыңдау үшін оқушыларға сөз берейік! 2-Жүргізуші: Қазақ даласы небір төңкеріс, небір көтеріліс, небір жеңіс пен жеңілісті, қызық пен қиындықты өткерді емес пе? Ата – бабаларымыздың осындай ерлігінің бірі – Ұлы Отан соғысындағы жеңісі. Сонау 1941 жылы бейбіт жатқан елге Германия фашизмдері ашқан соғыс қазақ ұлдарын да жалмап, ананы баласыз, баланы әкесіз, әйелді жесір қалдырғаны әрбір адамның жүрегінде. 2-Жүргізуші: Біздің Қазақстанда да соғыс оты шарпымаған шаңырақ кем де кем. Жүз мыңдаған ата – әкелеріміз соғыстың алғашқы сәтінде – ақ майданға аттанды. Осы қан майданда мерт болған ерлердің рухына, бүгін арамызда асқар таудай болып жүрген аталарымызға басымызды иіп тағзым етейік. Олардың ерлік істерін ешкім де ешқашан да ұмытпауға тиіс. 1-Жүргізуші: Бақыт сыйлап жатады әр күн Санамызға жарық берген Әкелері аталардың Бұл Жеңісті алып келген Қуантамыз ән сап жұртты, Келе берсін бақыт таңы. Жеңіс күнің болсын құтты, Батырлардың ұрпақтары – деп келесі бөлімімізді оқушылардың жеңіс туралы әндеріне береміз! 2-Жүргізуші: Міне, Ұлы Жеңіс күнінің 70 жылдық мерекесі кезекті көктемнің шуақты күнімен келіп отыр. Иә, осынау ұлан-ғайыр даламыз нені бастан кешірмеді дейсіз? 1-Жүргізуші: Иә, әрине осындай қиын қыстау кезеңдерді бастан кешіргендегі қазақ халқының еңбекқорлығын, сабырлығын, төзімділігін баса атап айтсақ артық болмас еді. 2- Жүргізуші: Барша халық жеңіс күнін тойлайды, Жас сәбилер думандатып ойнайды. Ардагерлер көздеріне жас алып, Ұрпақтардың амандығын ойлайды. 1- Жүргізуші: Соғыс бітті … Ауыр да азапты жылдар артта қалды, біздің еліміз бейбітшілікті сүйеді. Ананы – баладан, баланы – анадан айырған сұм соғысқа жол жоқ … 2-Жүргізуші: Ешкім де, еш нәрсе де ұмытылмайды! деген келесі бөліміміз бойынша оқушылардың шығармашылығына береміз! 1-Жүргізуші: Елге қауіп төнбесін, Егестен адам өлмесін! Есен – аман болайық, Енді соғыс болмасын! Өртенбесін туған ел! Шайқалмасын асқар бел! Шайқалмасын шалқар көл! 1-Жүргізуші: Жасасын Жеңіс! Бақытты елім күле бер! Тәуелсіз болып болашағына жүре бер! Болмасын соғыс! Болмасын соғыс! Болмасын! Осы тілекпен барша халайық түрегел! 2-Жүргізуші: Жеңістен жеңіске жетіп жүре беріңіздер! Қатысқан барлық оқушыларға алғысымызды білдіреміз!. Жеңіс туымыз көк аспанымызда желбірей берсін! 1-Жүргізуші: Сау болыңыздар!

Сынып сағатына өзіндік талдау

Астана қаласы №29 орта мектебінің бастауыш сынып мұғалімі Рахимжанова Асемгул Мухамедкаримовна

Сабақтың тақырыбы: Ұлы жеңіске 70 жыл

2.  «Қазақстандықтардың соғысқа аттануы»  бейнекөрініс 3. Ұлы Жеңіске мың тағзым! (жеңіс туралы әндер, өлеңдер оқу) 4. Отан үшін от кешкендер (слайд ) 6. «Отты жылдар елесің, кітаптан оқып білесің...» (кітап көрмесі) 7. «Бауыржан Момышұлының өз дауысы» бейнекөрініс 8. Қорытынды

Сабақтың мақсаты:: Оқушыларды адамгершілікке, Отанын сүюге, оны қорғауға баулу. Отанға деген сүйіспеншілігін арттыру, оларға патриоттық тәрбие бере отырып, өз елін, жерін қастерлейтін саналы да парасатты азамат етіп тәрбиелеу.Өз халқының мәдени және тарихи мұрасын құрметтеуге, сақтауға және сол арқылы патриоттық сезімдерін жетілдіруге тәрбиелеу.

Пайдаланған әдіс-тәсілдер: түсіндіру, ақпарат беру, көрнекілік (интерактивті тақтаны пайдалану), дебат-пікірсайыс (өз көзқарастарын дәлелдеу кезінде)

     Сабақ басында оқушыларға сабақ алдында психология тұрғысынан қолайлы жағдай туғызу үшін,  назарларын сабаққа аудару үшін әрі тақырыпқа кіріспе ретінде «Қазақстандықтардың соғысқа аттануы» бейнекөрінісі көрсетілді.Жүргізушілер Айша мен Амира Ұлы Отан соғысы туралы көптеген мәліметтер айтты. Оқушылар қызығушылықпен тыңдап, бейнекөріністерді мұқият тыңдап отырды.

Бекіту кезінде балалар ойын шашыратпай, тақырыпқа  сүйене отырып нақты тарихи дерек пен әдеби дәйекті пайдаланып сөйлей алды.  Яғни, оқушылар мәліметті саралап, сұрыптап, өз ойын жеткізе алды.Ұлы Отан соғысы жайлы  

түсініктері кеңейді.