2014 жыл 18 мамыр күні Республикалық «НұрОтан» партиясы, ҚР Білім және ғылым министрлігі және Астана қаласының Отбасылық тәрбиелеу институтының ұйымдастыруымен №92 гимназия базасында  «Жасөспірімнің ҰБТ тапсыруға дайындығы кезінде ата-аналарға психологиялық көмек көрсету» тақырыбында бірыңғай ата-аналар жиналысы өтті. Жиналысқа қала бойынша  №6, 38, 41, 92, 93 білім беру ұйымдарынан 11 сынып білім алушыларының ата-аналары қатысып, ҰБТ кездесетін әртүрлі жағдайлардың алдын алу, дұрыс шешім қабылдау жайлы мәліметтер алды. Жиналысты гимназия директоры Айман Оразқызы Мусина  ашып, жүргізіп отырды. Алғашқы құттықтау сөз «НұрОтан» партиясының облыстық филиалы басшысының бірінші орынбасары Қадиша Базарбайқызы Оспановаға берілді.  Қалалық білім бөлімі  басшысының орынбасары Райса Амиртайқызы Кенешова Білім және ғылым вице-министрі Балықбаев Тахир Оспанұлының жиынға қатысушыларға арналған  құттықтау сөзін оқып, ата-аналар назарына жеткізді. Астана қаласының Отбасылық тәрбиелеу институтының өкілі Орлова Лилия Александровна жиынға қатысушыларды құттықтап,  сәттілік тіледі. Қарағанды қаласының Отбасылық тәрбиелеу орталығының  директоры Салтанат Жұмабайқызы Куленова  мен  №36 орта мектебінің педагог-психологы Зайра Ормантайқызы Шаяхметова ҰБТ – ге дайындалудың дұрыс, әрі тиімді жолдарын арнайы бейнефильмдер арқылы көрсете отырып, түлектердің ата-аналарының сұрақтарына  жауап берді. Жиын соңында ата-аналарға емтихандарға және ҰБТ-ге дайындалуға көмек жадынамалары таратылып берілді.