Критериалдық  бағалау жүйесін талқылау және оған сәйкес 11-ші эксперименттік сыныптардың байқау оқулықтары бойынша тапсырмалар құрастыру мақсатында Ы.Алтынсарин атындағы Ұлттық білім академиясының ұйымдастыруымен №92 гимназия базасында 29-30 сәуір күндері «Критериалдық бағалау жүйесі: теориясы және тәжірибесі» тақырыбында республикалық ғылыми-әдістемелік семинар өтті. Семинарға эксперименттік мектептердің директор орынбасарлары, 11-ші эксперимент сынып мұғалімдері, облыстық (қалалық) білім басқармаларының әдіскерлері қатысып тәжірибе алмасты. Семинар барысында Ы.Алтынсарин атындағы ҰБА вице-президенті Сыздыкова Ғалия Сәбитқызы орта білім беруді дамытудың басымды бағыттарын жүзеге асыру аясында эксперименттік 12-ші сынып білім беру мазмұнының ерекшеліктеріне тоқталса, Болатбаева Күлжанат Нұрымжанқызы 12-ші сыныпта кредитттік технология  мен оқыту жағдайында критериалдық бағалау жүйесін енгізу бойынша, 12 жылдық білім зертханасының жетекші ғылыми қызметкері Мұхамедханова Алмагул Кеңесханқызы эксперименттік сынып мұғалімдерінің критериалдық бағалау жүйесі бойынша әзірлемелерін талдау және оларды жетілдіру жолдары бойынша пікір алмасты. Жамбыл облысындағы «Дарын» мектеп-интернатының ғылыми-әдістемелік жұмысы бойынша директор орынбасары Дусупова Жанылсын Мұқанқызы «Критериалдық бағалау жүйесін жүзеге асыру  тәжірибесі: күрделі мәселелер мен шешу жолдары» тақырыбында өз тәжірибесін ортаға салды. Қарағанды қаласының №93 гимназияның  директор орынбасары  Юнацкая Елена Викторовна сабақта әрбір оқушыны бағалау тәсілдері бойынша атқарылып жатқан жұмыстарымен бөлісті. Екі күндік семинардың  қорытынды есебі тыңдалып, рефлекция жасалынды. Пән мұғалімдері өздерін мазалап жүрген сұрақтарын қойып, тиісті жауаптарын алды.