Елінің ертеңіне елеңдеген әрбір қазақстандық 17 қаңтар күні тағы да теледидар алдына жиналып, ұлт көшбасшысының жолдауын мұқият тыңдады. Елбасы Н.Ә.Назарбаевтың биылғы жылғы «Қазақстан жолы – 2050: Бір мақсат, бір мүдде, бір болашақ» атты Жолдауы гимназия ұжымы арасында талданды. Гимназия директоры А.О.Мусина Жолдау бағыттарын іске асырудағы мұғалімдердің алдындағы негізгі міндеттерге тоқталды. «Бар жақсылық балаларға» демекші, жастар тәрбиесіне, олардың сапалы білім алуына және салауатты өмір сүруіне мемлекет тарапынан жасалған жағдайларды тиімді, сапалы ұйымдастыру жұмыстарына баса назар аударды. Сапалы білім, саналы тәрбие тұтқасы – біздер, ұстаздар дей келе, елбасының бастамаларының бірі – ұстаздардың да білім көтеруіне қолдау көрсетуі. Ұстаздардың шығармашылығын шыңдайтын, болашақ ұрпағымыздың сапалы білім алуына жол көрсететін ұстаздар дайындығына көңіл бөле отырып, жаңа бағдарламалар, үлгілі педагогикалық кадрлар мәселесіне де тоқталып өтті. Бұл тұрғыдан алып қарастыратын болсақ, еліміздегі Назарбаев зияткерлік мектептері мен Кембридж университеті бірігіп жасаған жүйе бойынша ұстаздардың біліктілігін арттыру курстарынан өтуі де кеңінен қолдау тауып, ұстаздар арасында жаңа серпін пайда бола бастады. Осындай жаңалықтарды өз бойымызға сіңіре отырып, білгендерден үйрене отырып, алдымыздағы белестерден сүрінбей өтуге қолдау көрсететін ұстаздар қауымы екенін атап айтты. Ұстаздар қауымын «Мәңгілік ел» болып қалу үшін, болашақ ұрпақтың қамы үшін аянбай еңбектенуге, жаңалыққа бет бұруға, халық қамы үшін жанашыр болуға шақырды. Жолдаудағы халықтың әлеуметтік жағдайын жақсартуға бағытталған, яғни ерекше көңіл бөлінген нақты іс – шаралар жүйесіне, атап айтқанда, 2015 жылы – мұғалімдердің жалақысын 29 %-ға, дәрігерлердің жалақысын 28 %-ға, әлеуметтік қызметшілер жалақысын 40 %-ға, әлеуметтік көмек мөлшерін 25 %-ға, ал 2016 жылы студенттердің шәкірт ақысын 25 %-ға көтерілетіндігін жағымды жаңалық ретінде атап өтті.
Мұғалімдер қауымы да өз ойларын айтып, пікірлерін ортаға салды. Қысқаша тоқталып өтетін болсақ, тарих пәні мұғалімі Б.Е.Мактупова: «Мемлекет басшысының халыққа Жолдауы Қазақстан Республикасының 2050 жылға дейінгі даму жолын анық көрсетіп берген, жаңа бастамаларға толы, патриоттық сезімді шыңдайтың, ақыл – ой мен жаңаша ойлаудың ерең үлгісі болып табылатын, елдік мұратқа жету жолындағы ереже –Жолдау деп танимыз» - деп атап айтты. Қазақ тілі мен әдебиеті пәні мұғалімі Г.Б.Жаркеева: «Тіл маманы ретінде Президентіміздің «қазақ қазақпен қазақша сөйлесу керектігі» жөніндегі ойлары жүрекке жылы әсер етті. Елбасы бұған дейінгі Жолдауларында да мемлекеттік тілдің мәртебесін көтеру турасында мәселе қойған. Бүгінгі күні қазақ тілін басқа ұлт өкілдері арасында меңгеру 10% - ға өскендігі қуантарлық жаңалық болды. Ұлттың ең басты байлығы болып саналатын қазақ тіліне әрбір қазақстандық құрметпен қарауы қажеттігін ескерте келіп, бүгінгі күні «Ана тіліміз – мәңгілік елдің – мәңгілік тілі» болатынын баса айтты. Бұл - Елбасының мемлекеттік тілдің мәртебесін арттыру үшін әрқайсымыздың жауапкершілікті терең сезінуіміз керектігін тағы бір мәрте атап көрсетуі деп түсінемін» - деп өз ойын ортаға салды.
Елбасы Жолдауы мұғалімдер қауымын жаңа міндеттерге, тың мақсаттарға жігерлендіріп отыр.
Авторство:
