Қоғамның қажеттілігіне сай тұлғалар қалыптасады. Сондай мәртебелі мамандық иесі мұғалімдер де жеке тұлғалардың қалыптасуына, өрісі биік, қиялы ұшқыр ұрпақтың тәрбиеленуіне тікелей әсер етеді. Мен, Конысбаева Камшат Болатқызы, Қарағанды қаласының «Сәкен Сейфуллин атындағы гимназиясы» КММ Көркем еңбек пәнінің мұғалімі болып жұмыс жасаймын. Бүгінде 35 жылдық еңбек өтілі, педагог-зерттеуші біліктілік санатым бар.

Әкем Конысбаев Болат 12 бала тәрбиелеген үлгілі отбасының ұйытқысы болды. Карқаралы ауданының Қасым Аманжолов совхозыңың Ақбай-Қызылбай ауылының №24 орта мектебінде ұзақ жылдар бойы Математика және Физика пәнінің мұғалімі болған. Әкеміздің еңбегі елеусіз емес, солардың ішінде Қазақ КСР «Халық ағарту ісінің озық қызметкері» төсбелгісімен, Ұлы Жеңістің 60 жылдығына орай «Тыл ардагері» медалімен марапатталды. «Әке көрген оқ жонар» деген қағиданы ұстағандай, қазіргі таңда 4 баласы мұғалім. Ризагул Болатқызы - зейнеткер ұстаз. Көптеген Алғыс хаттар мен Құрмет грамоталарына ие болды, әдістемелік мақалалар жазды. Олардың көпшілігі «Бастауыш сынып» және «Қазақстан мектебі» журналдарында жарық көрді.

Дәулет Болатұлы Қарағанды қаласының №2 балалар сарайында математикадан дәріс береді. Қазақстан Республикасы «Білім беру ісінің Құрметті қызметкері» төс белгісінің иегері. Ұлағатты ұстаздық қызметпен үзбей айналысқан, осы уақыт ішінде талай жетістіктерге ие болды.

Ернар Болатұлы - «Қарағанды облысы Қарқаралы ауданы Қарағайлы кентінің жалпы білім беретін №16 орта мектебі» КММ Математика пәнінен сабақ береді. Оқушылары - облыстық, қалалық олимпиадалардың қатысушылары.

Әкеміздің тұңғыш немересі Бақытгүл Бағдатқызы да ұстаздық жол таңдап, Қарқаралы ауданы. «Тегісшілдік ауылының ЖББ №6 мектеп» КММ-сінің мектепалды даярлық сыныбының тәрбиешісі болып еңбек етіп жүр. 10 жылдық тәжірибесі бар маман алдыңғы толқын аға-апаларындай өз ізденімпаздық қасиетімен болашағынан көп үміт күттіреді. «Ұстаз болу – өз уақытын аямау, өзгенің бақытын аялау» деп М. Жұмабаев айтқандай ұрпақтан ұрпаққа жалғасын тапқан бұл мамандықты әулет дәстүрі әрі қарай жалғасын таба беретініне сенім мол.