Ұлттық рух тілмен кіріп, айбарлы іспен орнығады
        Бүгінде көп қазақтың бойындағы ұлттық рухтың жалыны сөніп бара жатқаны өкінішті. Қоғамда орын алған әлеуметтік әділетсіздіктер мен құрғақ сөздің көптігі, жастардың патриоттық сезімі мен идеологиясына әсер ететіні сөзсіз. Өскелең ұрпаққа тәлім беретін ересектер өз алдына, жастарымыз өз алдына сенделіп жүр. Біз қайда бара жатырмыз? Осы бір сұрақ ұлтым деп соғар жүрегі бар зиялы қауымның көңілін көптен алаңдатқан еді. Сондықтан да болар Облыстық білім басқармасы, Қарағанды қаласының білім бөлімі және МББҚБА және ҚДИ 2010-2011 оқу жылынан бастап облыс мектептерінде  «Ұлттық рухтағы қазақ мектебі» айдарымен тұрақты семинар-кеңес ұйымдастырып, игі іс бастаған еді. Қарағанды қаласындағы дарынды балаларға арналған қазақ-түрік лицейінен бастама алған бұл шараны жүз жасаған бәйтерек ұлы Жамбыл атындағы  № 7 мектеп-интернаты іліп әкетті. Ақ армандар асқақтап келіп, игі істі жалғастыру енді қала мектептері бойынша бірінші болып № 92 гимназияның еншісіне берілді. Семинар-кеңеске келген Облыстық білім басқармасының басшыларын, қызметкерлерін, Облыстық ардагерлер кеңесінің жастармен жұмыс комиссиясының төрайымы, ардагер ұстаз С.Б. Мұқанова, сондай-ақ Балқаш, Жезқазған, Саран, Абай, Теміртау, Сәтпаев, Сұрыптау, Шахтинск қалаларынан ат арытып келген мектеп директорлары, директордың тәрбие ісі орынбасарларын, әдістемелік бірлестік жетекшілерін, тарих, қазақ тілі, ағылшын тілі мұғалімдері мен Білім беру үйлерінің тілдер жөніндегі әдіскерлерін, жалпы саны 60 шақты қонақтарды гимназияның І қабатынан бастап  оркестр күмбірлеген күймен қарсы алып, келген қонақтарға жылы лебіздерін білдіріп, жиын залына шығарып салып отырды. Әсем безендірілген жиын залында МББҚБА және ҚДИ ректоры С.С. Қонтаев семинар-кеңесті өзінің жүрек жарды әдемі сөздерімен, жақсы тілектерімен ашып берді, мектеп директоры Айман Оразқызы қонақтарды гимназияның тарихымен, соңғы бес жылдағы жетістіктерімен, әрбір кафедраның жұмыстарымен хабардар етіп өтті де, семинар – кеңестің мақсат, міндеттерін айқындап, бағдарламамен  таныстырды.
       Тілдің үш тұғырлылығына, 12 жылдық білім беру мәселесіне және қазіргі таңдағы өзекті мәселелердің бірі – Тілге баса назар аударылып құрылған бағдарлама мазмұнды да, мәнді өтті. «Біз қашанғы ұлттық рухымызды шоқпар қылып көтермей, белімізге байлап сүйреп жүре береміз?» деген ойды желеу еткен ұстаздар өткізілетін барлық іс – шараларын осы мақсатта құрды. Атап айтқанда, «Қазақстан – үлкен мемлекеттердің бірі» атты ағылшын тілінде өткен сабақ (Хайруллина Г.Д.), «Ұлт болашағы ұрпақ тәрбиесінде» айдарымен өткен дебат (Қалиева Д.М.), «Мен жазбаймын өлеңді ермек үшін» атты жыр – мүшайра (Жаркеева Г.Б.), «Билер институты. Билер кеңесі» атты философиялық сабақ (Мактупова Б.Е.), «Екі санды анықта» тақырыбындағы логикалық сабақ (Ақмағанбетова А.М.), А.П. Чехов әңгімелерін сахналау (Нұржанова  Г.Д., Макажанова А.С.), «Болашақ белестері» тақырыбындағы психологиялық тренинг (Бижанова Ж.Ә., Қадырова Ш.Ж.) ұлттық рухтың жалыны сөнуге айналған бұл заманда өскелең ұрпақ бойында ұлттық рухты қалыптастыруға зор ықпал етті, гимназия ұстаздары өздеріне жүктелген істі абыроймен атқарып, келген қонақтардың ризашылығын  алды.
         ҚарМУ-нің философия факультетінің оқытушысы, ф.ғ.д. Саттарова Ф.Ф. гимназияда он жылдан артық «Әлемдік көркем мәдениет тарихы» пәнінен дәріс беріп, дарынды оқушыларға ғылыми жетекшілік жасауда. Ұстаздың семинар-кеңестегі «Ұлттық рухтың тәрбиедегі және шығармашылықтағы маңызы» атты конференция сабағы өскелең ұрпақты ұлттық рухта тәрбиелеудің үздік үлгісі бола алды.
         Азаттық рухы кең көсілген Арқадан кербез Алатауға дейінгі, алтын тамыр Алтайдан кәрі Каспийге дейінгі аралықта ұланғайыр даланың ұлы өркениетін қалыптастырған батыр бабаларымыздың қайсар мінезінен, ұрпаққа ұлттығын ұлықтайтын  ұлы ойлардан туындаған  «Рухани жаңғырық» атты көрме, «Ана тілі – азаматтық өлшем бұл...» атты әдеби-музыкалық кеш барша қонақтардың көңілінен шығып, гимназиядағы этнографиялық мұражайдың, әуен-саз үйірмесінің маңызын тағы бір аша түскендей болды. Мұражай жетекшісі Акимжанова Қ.Т., әуен-саз үйірме жетекшісі Тыхметов Б.Е.  бастаған оқушылардан құрылған шығармашылық топ семинар-кеңестегі өзекті мәселенің тағы бір қырын танытты.
         Халқымыздың маңдайына біткен ұлттық құндылықтарын, сонау өткен ғасырлардан өшпес мұра болып қалыптасып келе жатқан үлгі-насихатын, асыл мұраларын  оқушылардың бойына сіңіріп, ұлттық мәдениетімізді әлемдік деңгейдегі мәдениетке жеткізіп, өркендетуге деген патриоттық сезімді қалыптастыруға бір кісідей атсалыссақ, игі бастама өз жемісін берері сөзсіз.
                                                                                                                                     Жаркеева Г.Б. № 92 гимназия