Қарағанды облысында төтенше жағдай режимін бұзғаны үшін 260 адам әкімшілік жазаға тартылды.Олардың 109-ына айыппұл салынып,.қалғаны әкімшілік қамауға алынды. Қалған жағдайларда ескертумен шектелді.

 Бұл туралы Қарағанды облысының полиция Департаментінің ресми өкілі Жанатай Сембеков хабарлады. - Коронавирустық инфекцияның таралуын азайту мақсатында қазіргі уақытта облыс аумағында 24 карантиндік бекет жұмыс істейді.Олардың міндеттері- елді мекендердің кіреберіс пен шығаберісін бақылауды жүзеге асыру. Азаматтардың қоғамдық орындарда болуына және көшеде себепсіз серуендеуге жол бермеу үшін полиция күшімен патрульдеу жұмыстары жүргізілуде, - деді Жанатай Сембеков. Ол шектеулерді еске салды. Үйден сыртқа шығуға тек аса қажет болған жағдайда ғана болады: жұмысқа бару және қайту; азық-түлік пен дәрі-дәрмектер үшін жақын дүкенге, дәріханаға (тұрғылықты жерінен 1 500 м радиуста) баруға; банк операцияларын жүргізу үшін. Иттерді үйден 500 метрден аспайтын қашықтықта серуендетуге рұқсат етіледі.Қала бойынша жаяу және көлікпен жүру барынша шектеулі. Кәмелетке толмағандарға үлкендерсіз көшеде жүруге ТЫЙЫМ САЛЫНАДЫ.  - 65 жастан асқан адамдарға үйден шықпау керек. - Сіздерді құқықтық тәртіпті сақтауға, белгіленген тыйым салу және шектеу шараларын орындауға, сондай-ақ құқық қорғау қызметтерінің жұмысына түсіністікпен қарауға шақырамыз, - деп мәлімдеді ПД ресми өкілі қарағандылықтарға. - Көшеге шыққан кезде өзімен бірге жеке басын куәландыратын құжатты алып жүру керек. - Ол болмаған жағдайда патрульдер жақын жердегі полиция бөліміне жеке басын анықтау үшін жеткізуге, сондай-ақ азаматтың көшеде немесе қоғамдық орындарда болу заңдылығын анықтау үшін жеткізуге құқылы, - деп түсіндірді Жанатай Сембеков.ҚР ӘҚБтК-нің 476-бабы ("төтенше жағдай режимін бұзу") ескерту немесе 10 АЕК (27 780 теңге) мөлшерінде айыппұл, немесе 15 тәулікке дейін әкімшілік қамау түріндегі жазаны көздейді.