2016 жылдың 17 наурызында «Мағжан тағылымы-4» қалалық ғылыми-тәжірибелік конференциясы онлайн түрінде өткізілді. Конференция ақпараттық технологиялармен байланысты әлемдік стандартқа сай мүдделі жаңа білім беру мақсатында өтіп отыр. Конференция 4 бағытта болды: «ХХ ғасырдың басындағы Алаш азаматтары», «Жаңа дәуір – жаңа көзқарас», «Білім берудегі жаңашыл әдістеме», «Оқушылардың ғылыми ізденістері». Сол күні гимназияда Мағжан кабинеті ашылып, гимназия директоры Базыл Жанкелді Сағынтайұлы және қазақ тілі мен әдебиеті пәнінің мұғалімдері Дана Мұратқызы мен Қымбат Дәуітбекқызының 5-сынып оқушыларына арналған «Мағжантану» әдістемелік оқулығының, филология ғылымдарының докторы, профессор Берік Серікбайұлы мен гимназия директоры Базыл Жанкелді Сағынтайұлының 11-сыныпқа арналған «Абайтану» оқулықтарының тұсауы кесілді. Сондай-ақ, желілік қауымдастық аясында №23 ЖББОМ және №101 мектеп-лицейі мұғалімдерінің қатысуымен «Мәңгілік Ел» идеясы – бүгінгі елдігіміздің негізі» атты коучинг өткізілді. Қаламыздағы Ә.Бөкейхан атындағы №76 мектеп пен №41 мектептер де конференцияға онлайн түрінде қатысты. Қазақстан - Қарағанды телеарнасы келіп, гимназиямыздың талантты оқушысы Қуаныш Нұртілеу мен 5 «ә» сынып оқушысы Мұратбек Ерсұлтан тілек сұхбат берді. Сұхбат барысында Мағжан атындағы мектепте оқитындарын мақтан тұтып, Мағжан кабинетінің ашылғанына өте қуанышты екендерін жеткізді.
Байланыс телефондары
