1998 жылы гимназиямызда  ата-аналар үшін «Шырақ» ата-аналар университеті- ата-ана, мектеп, оқушы арасындағы тәжірибе алмасу орталығы ашылған болатын. «Шырақ» ағарту университетінің жұмысы ата-аналармен тығыз қарым-қатынас орнату мақсатында ұйымдастырылғандықтан, бірінші үш жыл бойы ата-аналар үшін «Мағжантану» курсы өткізілді. Курсқа қатысушылар Мағжан Жұмабайұлының өмірі мен шығармашылығымен сусындады. Одан әрі Мағжанның бала тәрбиесіндегі ата-ана мен ұстазға жол сілтейтін ұлы еңбегі «Педагогикасының» кәусарына қанықты.    

       Қазіргі таңда дәстүрге айналған мектеп жұмыстарының ішінде шоқтығы биік «Шырақ» ағарту университетінің жұмысы жыл санап салмақтыланып келеді. Кейін тізгінді Кошикова Мағрипа Балтабаевна, Алимжанова Гүлдана Рамазановна, Бикен Қалымқұловна, Қымбат Дәуітбековна, Қаламқас Нығметовналар алып, жүйелі жұмысты жалғастырды.

      Бүгінде Құттыбаева Ләйла Қайратқызы басшылық етіп отырған «Шырақ» ағарту университеті жұмысы - Мағжан гимназиясының дәстүрлі  ісінің бірі...

      Университет тыңдаушыларымен, яғни ата-аналармен жұмыстар пікір алысу, диспут, дебат, педагогикалық, психологиялық жағдаяттарды талдау төңірегінде ақпараттық технологияны қолдана отырып жүргізіледі.

Ләйла Қайратқызы бастауыш сынып мұғалімі болғандықтан осы желтоқсан айының 15 – ші жұлдызында өткен «Бастауыш сынып оқушыларының жас ерекшеліктеріне байланысты оқытуда қосымша сабақтардың тиімділігі» атты бастауыш сынып мұғалімдерінің қалалық семинарында үй тапсырмасының орындалуы жайлы отырыс өткізді. «Бала тәрбиесі – бір өнер, өнер болғанда да ауыр өнер, жеке бір ғылым иесі болуды тілейтін өнер» деп Мағжан бабамыз айтпақшы, бастауышта баламен үй тапсырмасын орындау да шеберлікті қажет етеді. Мектеп пен үй жағдайында болатын кейбір мәселелердің шешімін табу, талқылау мақсатында өткен бұл отырыстан ата-аналар мен ұстаздар өзіне қажетті көп мағлұмат алды.

      Қазіргі таңда ұстаздың мойнындағы үлкен жүк - ұлт тәрбиесі, сол жолда талмай еңбек етіп жатқан ұстаздарымыз баршылық. Мағжан атындағы гимназиямыздың беделі де, бетке ұстары да осы ұстаздар. Тәуелсіздік қарсаңында өткен семинардың берері көп болды. «Шырағымыздың» шырағданы қашан да жарық болсын деймін! Шәкірттің шабытын оятып, шырағын жағып жүрейік!