«Ақ Үміт» қайырымдылық акциясы барысында М.Жұмабаев атындағы №39 гимназияда көптеген іс - шаралар  ұйымдастырылды. Акция кезінде әлеуметтік педагогтар Қ.Е.Жумашова, Р.А.Тусупбекова Майқұдықта орналасқан КММ «Қарағанды облысының балаларға арналған психоневрологиялық медициналық - әлеуметтік мекемесіне» барып қайтты. Онда жас ерекшеліктері әр түрлі, сан түрлі ауытқулары бар мүмкіндігі шектеулі балалар тәрбиеленіп жатыр. Бізді мекеменің директорының орынбасары Ержанова Салтанат Елеусізқызы жақсы қарсы алды. Топтағы балалар да бізді жылы шыраймен қабылдады. Жиналған қаражатқа жеміс-жидектер мен әр түрлі ойыншықтар сатып алып,  базарлықтарымызды сол  балаларға табыстадық және де өз есебімізден екі балаға спорттық аяқ-киім мен спорттық қолғап табыстадық. Мұң ұялаған балалардың жүздерінен күлкі, шаттық үнді естігенде, өз жүрегіміз де елжіреп, көзімізге жас та келді. Мекеме әкімшілігі де өз кезегінде ризашылықтарын білдіріп, біздің гимназиямызға алғыс хатын табыстады.

Елімізде Жүрекке жылу сыйлайтын, көпшіліктің назарынан тыс қалмайтын осындай қайырымдылық акциялары жиі болып тұрса деген ниеттеміз және де тағы да бір айтарымыз, қалталы азаматтарымыз қайырымдылық акцияларынан тыс қалмай, өз үлестерін қосса деген тілегіміз бар. Мұндай игі істер өз жалғасын тапса нұр үстіне нұр болар еді.