Ұлағатты ұстазымыз Тұрсын Мұстафақызы мұғалімдер күні қарсаңында Астана қаласында өткен «Үздік педагог» байқауының І орын иегері атанып отыр. Осымен 3 рет өткізіліп отырған байқаудың облыстық кезеңіне 48 жеңімпаз өткен болатын. Жүзден жүйрік, мыңнан тұлпар шыққан жеті адам аймақ намысын қорғап, Республикалық кезеңге жолдама алды. Әріптесіміз Тұрсын Мұстафақызы осы ұстаздардың арасынан топты жарып І орынды иеленді.

     Әріптесіміздің жетістігі біз үшін үлкен мақтаныш. Республикалық  додада  ұстаздық  ұлағат  танытып, оза шауып  бәйге  алған, тәжірбиелі де білікті ұстазымызды жеңісімен   шын  жүректен  құттықтаймыз!

     Алар асуыңыз аласармасын, шығармашылығыңыз шыңдала берсін демекпіз!

   Тұрсын Мұстафақызына

Жол сілтеп қараңғыда жанған шамдай,

Өлшеусіз білім бердің таңнан талмай.

Мектептің әр баласын мәпеледің,

Өсірген талшыбығын бағбандардай.

Шәкіртін көкке  баулып қырандайын,

Тек шыңға жетелеген шынардайын.

Өзі де талай шыңды бағындырған,

Ұстазға ұжым болып жыр арнайын.

Үздігі атандыңыз мұғалімнің,

Себебі болып тұрсыз жыр-әнімнің.

Қашан да аламанға  қосатұғын,

Тұяғы мұқалмасын пырағыңның.

Мақтан еттік, жеңісін, ұтқан ісін,

Біз үшін ұстаздардың ұстазысың.

Тілейміз шын ниетпен өзіңізге,

Басыңнан бақ айналып, құт дарысын!

Шәкіртімен өткен барша ғұмыры,

Ізгіліктің шайқалмасын тұнығы.

Тәңір сізге қайрат берсін қайтпайтын,

Даңқыңыздың биік болсын тұғыры!

Гимназия ұжымы