Мағжан гимназиясының 30 жылдығына орай ашылған "Coworking" алаңында алғаш рет гимназиямыздағы дарынды балалармен кездесу өтті. Кездесуді өлеңнен де, өнерден де қара жаяу емес, ақынжанды ұстазымыз, жаратылыстану пәні мұғалімі Тұрар Бауыржан Қожатайұлы жүргізді. Кездесуге Жүсіпбек, Міржақып оқуларының жеңімпазы Жақсылық Мәди, "Бұқарекең жырлайды" байқауының жеңімпазы Жанайдарова Амина, "Қасым оқуының" жүлдегері Елемесов Алмас, "Бағдат Мүбәрак" оқуының жүлдегері Тұрсынбай Арсанат және кеше ғана өткен жыршы-жыраулар байқауының 1-орын иегері 3-сынып оқушысы Жанкелді Нұралы Сырымұлы шақырылды. Кеш еркін форматта, өте қызықты өтті. Жүлдегерлер өлең оқып, Нұралы терме орындады. Таяуда өткен "Егіз-лебіз" байқауына қатысқан Арсанатты топ алдында сынап көру мақсатында көрермендер әр жерден өлең сұрады. Арсанат кез келген өлеңді іліп әкетіп, 30 өлеңді мүдірмей айтып бере алатынын дәлелдеді. Гимназия басшысы дарынды оқушыларды жігерлендіретін тілегін айтып, ұстаздарына алғыс білдірді. Барлық оқушыларды табанды еңбек етуге, бар білім кітапта екенін ескертіп, кітапты көп оқуға шақырды. Мағжан жырлағандай "Толқыннан толқын туады" демекші, таланттар сарқылмайтынының куәсі болдық. Оқушылар жылы пікірлерін білдіріп, таңданыстарын жасырмады. Кездесу жоғары деңгейде, тамаша көңіл-күйде өтті.