рпақ тәрбиесі – ұстазға байланысты. “Ұяда не көрсең, ұшқанда соны ілерсің” дегендей өнегелі ұстаздан жақсы шәкірт шығатыны сөзсіз. Ұстаз – ұлағатты есім. Шәкірттерін білім нәрімен сусындатып, тәлім-тәрбие беру, жақсы қасиеттерді бойына дарытып, адамгершілік рухта бағыт-бағдар беруде ұстаздың еңбегі зор. Сондықтан да ол әрдайым қасиетті тұлға ретінде ерекшеленеді. Жаңа оқу жылымен қатарлас келетін Мұғалімдер күні де күздің үлесіне тиіпті. Міне бүгін ұстаздардың кәсіби мерекесі мектеп қабырғасында аталып өтті. М.Жұмабаев атындағы №39 гимназиясында Ұстаздар күніне орай 11 «Ә» сыныбының жетекшісі Р.Абдированың ұйымдастыруымен «Ұстаз-халық анасы» атты кеш өткізілді. Кеш жоғары деңгейде өтті. Кештің бастамасы ретінде мектебіміздің басшысы Базыл Жанкелді Сағынтайұлының шәкірттер санасына сәуле шашып, шырақ отын маздатқан ұстаздар қауымына ақ лебіз, жылы тілегін білдіру үшін құттықтау сөзімен басталып, ұстаздарға алғыс хаттармен, грамоталарды табыс етті. Құттықтау сөзінен кейін, кешіміз әсем әндермен, сыңғырлаған күйлермен, аты әлемге таралған «Шолпан» би ансамблінің мың бұрала билеген әдемі қыздарының билерімен жалғасын тапты. Мерекелік кеште гимназияның оқушылары өз өнерлерін көрсетті, 1 «Б» сынып оқушысының Әубәкірімова Айдана «Астана» әнімен, Қабыкен Мөлдір «Ұстазым» әнін орындап кештің сәнін келтірді.
Бастауыш сынып оқушылары орындауында ұстаздарға арналған өлең шумақтары мен арнау тілектерін білдіріп, әсем әндерін жолдады. 11 «Ә» сынып оқушысы Жапанбаева Әйгерім ұстаздар күніне арнаған сазды әуенін пианинода орындады. Кештің жалғасын музыка пәнінің мұғалімі Нығыметова Лаура Сайранқызының орындауында «Жібектің елі» әнімен жалғасты. 11 «А» сынып оқушысы Ыбыш Әділхан «Балбырауын» күйін тамылжыта орындады. Кеш соңында 11 сынып оқушылары ұстаздарға арналған ізгі тілектерімен жалғасып, әр ұстазға арнайы дайындап әкелген гүл шоқтарын таратып, табыс етті. Оқушылардың ұйымдастыруымен оқушылар мұғалімдердің орнына сабақ беріп, өзін-өзі басқару күні өз деңгейінде, сәтті өтті.
“Ұстаздық еткен жалықпас, үйретуден балаға” деп Абай атамыз айтқандай, ұстаз еңбегінің қыр-сыры мол, қиын да жауапты, шығармашылық еңбек екендігін баршамыз мойындаймыз.
