3 наурыз күні гимназиямызда Әл-Фараби мен Абайдың өнегелі өмірімен таныстыру, заңғар тұлғалардың даналығы мен рухани асыл мұраларын насихаттап, өлеңдерін, әндерін мәнерлеп айтқызу мақсатында "Ғасырлар ғұламасы" атты әдеби-сазды кеш өтті.

Биыл елімізде Шығыстың ғұлама ойшылы, математик, астролог, музыка теоретигі, Аристотельден кейінгі екінші ұстаз атанған Әбу Насыр әл-Фарабидің  1150 жылдық және ақын, ағартушы, жазба қазақ әдебиетінің, қазақ әдеби тілінің негізін қалаушы, философ, композитор, аудармашы, саяси қайраткер, либералды білімді исламға таяна отырып, орыс және еуропа мәдениетімен жақындасу арқылы қазақ мәдениетін жаңартуды көздеген реформатор Абай Құнанбайұлының 175 жылдық мерейтойы.

Бүгінгі шара осы  ғасырдың ғұламаларының шығармашылығына арналды.

Кешті Қарағанды Мемлекеттік Универсиеті, филология факультетінің студенті Бодыкова Амина жүргізді.

Жүрегін шырақ етіп жандырған кім?

Жырымен жан сусынын қандырған кім?

Өзіне-өзі орнатып ескерткішті,

Мұра қып, кейінгіге қалдырған кім?

Ерте оянып , ойланып , ержеткен кім?

Талабын тас қияға өрлеткен кім?

Соқтықпалы, соқпақсыз жерде өскен кім?

Үнінен әділдіктің лебі ескен кім?

Арманын атандырып келешекке ,

Біздермен осы күнгі тілдескен кім? -деп кештің шымылдығын оқушылар жан жырымен сусындатқан Абайдай ғұламаның өлеңдерімен ашты.

Кеште Бұқпанов Рауанның орындауында Абайдың «Көзімнің қарасы», Айгүл Бақторазқызының орындауында «Желсіз түнде жарық-ай», филология факультетінің студенті         Серікпай Әлиманың орындауында "Сегіз аяқ" әні шырқалды. Сахнада филология факультетінің студенттері: Ілиясқызы Мадина, Әлімхан Сәулехан, Сайранбек Гүлсімай, Бодыкова Амина, Бексұлтанова Баян Абайдың қара сөздерін оқыды. Мағжан гимназиясының 10-сынып оқушысы, қалалық пән олимпиадасының 1-орын иегері, Абай оқуларының жүлдегері Ержан Айым «Көңілім қайтты достан да, дұшпаннан да...» өлеңін, Тұрсынбай Арсанат "Қансонарда бүркітші шығады аңға", Жанғозина Аяулым " "Ескендір" поэмасынан үзінді оқыды. 5-8 сынып оқушылары Әл-Фарабидің даналық сөздері мен өлеңдерін мәнерлеп жеткізді.

"Желсіз түнде жарық-ай" әнін бимен өрнектеген "Шолпан би" ансамблі кештің көркін кіргізді.

Әл-Фараби мен Абай арасын жақындастыру, оларды үндестіру, біздің халқымыздың мың жылдық рухани, мәдени-рухани дүниесін тірілту деген сөз. Демек бұл зор мақсатты халықтық іс деп білу керек… Әл-Фараби бабамыз ән-күй шығаратын композитор, музыка зерттеушісі, музыкалық аспаптарда шебер орындаушы да болды.

Өлді деуге бола ма, ойлаңдаршы, Өлмейтұғын артына сөз қалдырған, - деп төрелігін өзі айтып кеткен ғұламалардың   жарқын бейнесі, жалынды жыры бізбен бірге мыңдаған жыл бойы өмір сүріп келеді, мәңгі өмір сүре де бермек! Кештің соңында Нығметұлы Ерболат ғұламаларға арнауын оқып, филология ғылымдарының докторы, профессор Рахимов Берік Серікбайұлы, айтыскер ақын, филология ғылымдарының кандидаты, доцент Жұмағұлов Айтбай Ботпайұлы, ф.ғ.к профессор Такиров Саржан Уалиұлы және гимназиямыздың директоры, Жалелов Абылай Армияұлы қатысушыларға алғыс білдіріп, ғасыр ғұламасы Әл-Фараби мен ұлы Абайдың мерейтойымен тағы бір мәрте құттықтады.