Гимназиямызда Қарағанды қаласы дене тәрбиесі  және спорт бөлімімен бірге қалалық білім бөлімінің ұйымдастыруымен қазақтың  ұлттық дәстүрлі ойындарының бірі «Тоғызқұмалақтан» 17-19-21 жасқа дейінгі  жастар арасында  қалалық жекелей чемпионат  өтуде.  11-12 қаңтар аралығында  жеті турдан тұратын  ойын өтуде.  Бас төреші -жоғарға санатты  дене шынықтыру пәні мұғалімі Тажкеев  Нұрхат Маратұлы, хатшы- Тоғызқұмалақтан Қарағанды облысының аға жаттықтырушысы  Қаратай Сауле  Салдарбековна.

      Тоғызқұмалақ —қазақтың ұлттық дәстүрлі ойындарының бірі , ақыл-ой ойыны. Деректерге қарағанда, оның шығу тарихы 4 мың жылдық кезеңді қамтиды. Ал кейбір мамандардың айтуынша, оның пайда болған кезі бұдан да көп уақыт болуы әбден мүмкін. Тоғыз-құмалақ өткен ғасырларда қазақ даласындағы ең кең тараған ойын болатын. Қазақи аңыздарға сенетін болсақ, тоғызқұмалақ ойынын қарапайым қойшылар ойлап тапқан. Тоғызқұмалақ тақтасы ретінде олар жерді қазып, арнайы шұңқырлар жасаған. Ал, құмалақтарды дайындау үшін қойлардың құмалағын кептіріп, дәл сондай 162-сін қолданған. Ауызба-ауыз таралып келген аңыздарда тоғызқұмалақ ойыны қойшылар үшін керемет ермек болды.

          Қазіргі кезде әлемнің көптеген елдерінде тоғыз-құмалақ жақсы насихатталып жатыр. Мәселен, Қырғызстанда мектептерде тогуз-коргоолдан олимпиада өтеді екен. Қытайда, Қарақалпақстанда кітаптар, ғылыми еңбектер шығуда. Сондай-ақ, көршілес Алтайда, Қарашай-Шеркеште, Сахада үйірмелер ашылып, Еуропаның бірнеше елдерінде тоғыз-құмалақ ойналып жатыр деген дерек бар.