2019 -2020 оқу жылында гимназиямызда қосымша білім штаты беріліп, гимназия директоры Абылай Армияұлының  басшылығымен домбыра үйірмесі ретінде жұмыс жасай бастады. Жетекшілері: Бидалы Бекжігіт, Ақжан Мәдіханова.

Жас тілші Айтуған Нұрдәулет домбыра үйірмесінің жұмысымен танысып, Бидалы ұстазбен сұқбат жүргізу барысында жұмыстың қыр-сырын білді. Қазіргі таңда үйірмеде 24 оқушы тәлім алуда. Домбыра үйірмесінде оқушылар алғашқыда есту арқылы қай нота қай жерде екенін біле бастайды, ноталық сауаттылыққа ансамбль қалыптасқаннан кейін үйренеді екен. Жезқазған қаласында «Балауса» ансамблін құрып, қазіргі кезде «Перне сазы» ансамблімен жұмыс жасап жатқан ұстаз гимназиямыздың домбырашыларымен «Мағжан» атты ансамбль құрып үлгерген. Үйірмеге қатысушы, жас домбырашы Абдуссалам Хакімнің айтуынша Бидалы ұстаз жеңіл түрде, сабақты өте қызықты етіп үйретеді. Балалар кеткілері келмей бір күйді бастаса аяғына дейін үйренгенше тағат таппайды екен. Алдағы уақытта 1-2 сынып оқушыларынан жаңа топ жинап, ата-аналардың қолдауымен болашақта ұлттық киім тіктіру де ойларында бар екенін жеткізді. Домбыраның үні гимназиямызда  шарықтай берсін!

/Мөлдір Жақсыбаевна мен 10"Б" сынып оқушысы Айтуған Нұрдәулет "Журналистика" үйірмесінің кезекті жұмысын аяқтап, гимназиямыздағы домбыра үйірмесі жайлы сұқбатты талқылау үстінде.