ЖУРНАЛИСТ, АҒЫЛШЫН ТІЛІНІҢ МАМАНЫ ЕРНАТ МЕЛСҰЛЫМЕН МОТИВАЦИЯЛЫҚ КЕЗДЕСУ Абайдың “Толық адам” мен 4 даму туралы ой бөліскен кездесу жоғары деңгейде өтті. Кездесуге оқушылар мен студенттер, гимназия басшысы мен ұстаздар, қызығушылық танытқан бірнеше қонақтар келді. КММ "Жастар ресурстық орталығымен" бірлесе өткен кездесуді Жастармен жұмысты үйлестіру бөлімінің инспекторы, "Ұлағат" шығармашыл жастар клубының жетекшісі Эльмира Сайлауқызы жүргізіп отырды.Кештің пердесін жас ақын Жұман Бектас Абайдың бірінші қара сөзімен ашып, гимназиямыздың мақтаныштары Ержан Айым мен Айтуған Нұрдәулет Абайдың өлеңдерін оқыды. Осыдан кейін Ернат Мелсұлы сөз кезегін алып, көрермендерге "Толық адам" болу үшін қандай қадамдардың дұрыс екендігі жайында, 4 дамуға нелер жататынын, ойын Абайдың сөздерімен нақтылай түсіп, қызықты да, түсінікті етіп талдап берді. Тақырыпты аша түсетін презентациялар мен арнайы бейнежазбалар көрсетілді. КММ "Жастар ресурстық орталығы" Жастармен жұмысты үйлестіру бөлімінің инспекторы Аида Құрманғазықызы сөз алып, оқушыларды кітап оқуға шақыру арқылы кездесудің мазмұнын одан әрі толықтыра түсті. Ернат Мелсұлы кеш соңында авторлық "Ағылшынша тіл сындыру" оқулығымен таныстырып, кешті түйіндеді. Гимназия директорына кітабын сыйлады. Эльмира Сайлауқызы да гимназиямызға жан азығы кітап тарту етті. Гимназия директоры қонақтарға алғыс білдіріп, оқушыларға осындай мотивациялық кездесулердің көп болғанын құптайтынын жеткізді. Берері мол кездесуге қонақ боп келген Қарағанды экономиялық университетінің оқытушысы профессор Болат Сыздық ағамыз да өз ойымен бөлісіп, кездесудің пайдалы тұстарын тілге тиек етті.