«Ұлы дала мұрагерлері» форумының өтуі барысында гимназиямыздың жас тілшілері, Мақсұтова Бегайым мен Саматқызы Фатима «Жас журналист» жобасы бойынша гимназия төріне келген қонақтардан сұқбат алып, мектепішілік «Мектеп тынысы» газетінің таныстырылымын жасады.
Форумға келген қонақтарға газетке материалды қалай іріктейтіндерін, бұл басылым қандай айдарлармен қашаннан жарық көретіндігі жайлы, басқа да газетке қатысты мәліметтермен бөлісті. Осы орайда, облыстық «Орталық Қазақстан» газетінің бас редакторы Қамбар Жұмағалиұлы Ахметовтың сұқбатта айтылған форум жайлы бағасымен бөлісе кетсек.
- Мектеп директоры Абылай Жалеловтің есіміне бұрын сырттай қанық едік, жақын танысудың сәті түсті. Білім ұясы атына заты сай, маңдайалды мектеп екен. Ұжымының ұйымшылдығы, белсенділігі ұнады. Форум жоғары деңгейде өтті деп есептеймін. Мағжан есімін иемденген гимназия өзіне берілген атауына сай екенін көзбен көрдік. Әсіресе, маған ерекше ұнағаны балалардың өз қолынан шыққан туындылары, оларды өздерінің жарнамалауы. Ұлттық салт-дәстүр мен ұлттық құндылықтарымызды дәріптеу мақсатындағы рухани жаңғыру аясында жасалып отырған бұл дүниелер менің көңілімнен шықты. Мектепте қаншама үйірме жұмыс істеп тұр. Қолөнер, робот техникасы, ән-күй, спортқа қатысты жетістіктері өз алдына бір төбе. Қазір көп мектепте көзден ғайып болған қабырға газетін осы жерден таптық. Облыстық деңгейдегі би үйірмесі, оқушыларын былай қойғанда, мұғалімдер хорының өзі қандай!
Гимназия директоры Жалелов Абылай Армияұлы "Ted-x" форматында гимназияның даму жоспары бойынша ойталқы жүргізді. Мектепті дамытудың үшжылдық жоспарына біз де өз ұсынысымызды айтып, білім саласының өзекті мәселелері жөнінде біраз мағлұмат алдық.
Мазмұнды қойылымдар мен концерттік бағдарламаны тамашалап, көптеген жасалған жұмыстардың нәтижесінде бұл шаңырақта білімнің салтанат құрып тұрғанын байқадық.