«Рухани жаңғыру» бағдарламасының бір бағыты  «Қазақ тілі әліпбиін латын графикасына көшіру» арнайы жобасын жүзеге асыру мақсатында, Қарағанды қаласы білім бөлімінің ұйымдастыруымен 15 қазан, Мағжан Жұмабаев атындағы №39 гимназия базасында «Ұлттық әліпби» тақырыбында дөңгелек үстел болып өтті. 

Латыннегізді қазақ әліпбиін үйренудің артықшылықтары мен кездесетін қиыншылықтарды талдау, талқылау арқылы оқушыларға жаңа әліпбидің маңызы жайлы насихаттау жұмыстарын жүргізу мақсатында өткен шараға қазақ тілі мен әдебиет пәнінің және бастауыш сынып  мұғалімдері, оқушылар, ата-аналар, жоғары оқу орындарының ғалымдары  және осы саладағы тіл мамандары қатысты.

 Дөңгелек үстелге Е.Бөкетов атындағы Қарағанды мемлекеттік университетінің профессоры, филология ғылымдарының докторы Рахимов Берік Серікбайұлы және қазақ тіл білімі кафедрасының доценті Қалиев Бектұрсын Аманқұлұлы; Қарағанды облысының тілдерді дамыту жөніндегі басқармасы жанындағы  Ресурстық тіл орталығының басшысы Мұстағұлова Гүлназ Серікқызы, бөлім басшысы Жақанова Жұпар Рысқұлқызы; Облыстық «Ortalyq Qazaqstan» газеті Бас редакторының  орынбасары   Мұсабеков Ерсін Кәрібайұлы; «Өрлеу БА ҰО» АҚ филиалы Қарағанды облысы бойынша ПҚБАИ аға оқытушылары Шадетова Алтынгүл Кенесовна мен Тойымбекова Жұмакүл Бейсенбековна қатысып, өз ойларын ортаға салып, жарыссөзге қатысты.

Дөңгелек үстелді ашқан білім бөлімінің әдіскері Г.Б.Жаркеева 2016-2017 оқу жылынан бастап білім бөлімінің ұйымдастыруымен өткізіліп жатқан шараларға тоқталып өтіп, аталмыш шараның мақсатын нақтылап, келген қонақтармен таныстырып өтті. Гимназия директоры Жалелов Абылай Армияұлы гимназияда латынға көшу жағдайында жүргізіліп жатқан жұмыстарға тоқталып өтті. Одан әрі «Ұлттық әліпби» жобасының авторы, қазақ тілі мен әдебиет пәнінің мұғалімі Орден Сұрағанқызы бағдарламаның мазмұнымен, алдағы атқарылатын жұмыстармен таныстырды.

Ата-аналар мен оқушылар тарапынан қойылған сұрақтарға келіп отырған мамандар  дәлелді жауап берді.

Келген қонақтар  жаңалықтан қалыс қалмайтын, латыннегізді әліпбиге қатысты ауқымды жоба аясында жұмыс жасап жатқан ұстаздарға алғыс білдіріп, сәттілік тіледі.