Гимназиямызда ақпан айының 15-і күні қала мектептерінің арасында қалалық «100 кітап» жобасының  онлайн режимінде қорытынды кеші болып өтті. Білім алып жатқан оқушыларға қазақ әдебиетінің, әлем классикасының, жалпы түркітілдес халықтар әдебиетінің алтын қорындағы аса құнды шығармаларды оқыту мен үйретуді қолға алып отырған бұл жоба өз деңгейінде өтті. Жастар арасында кітап оқуды, отандық және әлемдік әдебиеттің терең мұраларын танып-білген, рухани дүниемен сусындаған, бәсекеге қабілетті тұлға қалыптастыруды мақсат тұтқан іс-шара жоғары деңгейде өтті.

Тізімде 50 қазақ әдебиетінің, 50 әлем әдебиетінің классикасы, оның ішінде 20 – ағылшын тілінде, 30 – орыс тілінде шығармалар таңдалды. Онлайн режимінде «100 кітап» жобасының қорытынды кеші әдеби-сазды кеш ретінде әрі марапаттау салтанаты түрінде жүргізілді.

Қорытынды кештің тізгінін Қарағанды қалалық білім бөлімінің әдіскері Жаркеева Гүлназ Бекетовна алып, №39 гимназия директоры Жалелов Абылай Армияұлы және ҚарМУ филология ғылымдарының докторы, профессор Рахимов Берік Серікбайұлы келген қонақтарға тілегін білдірді. Рахимов Б.С., Кубеков Б.Т., Омирбаева Д.М. авторлығымен 9-сынып оқушыларына арналған «Абайтану» оқулығының тұсауы кесілді. Осы жоба аясында мектепішілік деңгейден сүрінбей өткен алғыр оқушылар қалалық сайыста бағын сынады. Бекітілген тізім бойынша 5-11 сынып оқушылары арасында  оқыған кітабын жарнамалау, өлең-жырларды мәнерлеп оқу сайысы, сахналық қойылым, сурет көрмесі, электрондық кітапша, латын графикасында эссе жазу сияқты байқауларда сынға түсті.  Байқауға қала бойынша 35 мектеп өтініш білдіріп, 105 оқушы бағын сынады. Байқаудың қорытындысы бойынша, оқушыларға диплом, сыйлықтар және үздік деп танылған мектептерге алғыс хаттар берілді.

5-сыныптар арасында І орынды  иеленген М.Жұмабаев атындағы №39 гимназия оқушысы Тоқтарбек Ақнұр, 6-сыныптар бойынша І орынды №61 ЖББОМ оқушысы Эшкулова Акшархат, 7-сыныптардан  №15 ЖБББОМ оқушысы Каримова Жанел, 8-сыныптарда «Театр әлемінде» үш тілде сахналық қойылым бойынша М.Жұмабаев атындағы №39 гимназия оқушылары І орын, №25 мектептен 9-сыныптар бойынша сурет байқауынан Ақылбекова Ажар І орын иеленді. 10-сыныптарда  «Ұлы даланың ұлы мұрасы» электрондық кітапшасы үздік деп танылған №101 МЛ оқушысы Ерланова Дильназ І орынды жеңіп алды. 11-сынып бойынша үздік эссе №101 мектеп-гимназиясының оқушысы Қойшыбай Зере марапатталды. Сонымен қоса облыстық  Абай  атындағы Қарағанды облыстық балалар кітапханасы, Әуезов кітапханалары көрме ұйымдастырып, іс-шараға ат салысты. Бұл байқау алдағы уақыттада жалғасын таппақ.

http://ernur.kz/kazakstan/karaghandyda-100-kitap-baikauy-otti