Елбасының Қазақстан халқына кезекті жолдауы

30 қараша 2015ж.

  Елбасының Жолдауын ЖББОМ №66 ұжымы үлкен қызығушылықпен, мұқият тыңдады. Жолдау бізге үлкен әсер қалдырды. Негізгі мақсаты - ел экономикасын дағдарыстан кейінгі дамуға әзірлеу деп білеміз.
   Елбасының әр жылғы Жолдауы — тарихи құжат. Қайсысын алып қарасаңыз да стратегиялық маңыздылығы мен белгілі бір мерзімде нақты міндеттер мен мәселелердің шешілуін қамтамасыз етуге бағытталғанын көреміз.
    Мемлекет басшысының қазіргі күллі әлемді кеулеп бара жатқан аласапыран заманның талабына сай әрекет етудің жолдарын көрсетіп, осы қысталаң шақтарда елімізді адастырмай алға баратын бағыт-бағдарды белгілеп бергенін айрықша атап өту керек. Рас, қиын қиылыстарға, күрделі күндерге қарай аяқ басып барамыз. Ертеңгі күннің бұдан да төмен болуы мүмкін. Бұған әлемдегі алпауыт елдердің арасында болып жатқан текетірес те өзінің залалын тигізіп жатыр. Бүгінгі ахуал – біздің жетістіктерімізді сынға салып, елдігімізді шыңдай түсетін уақыт тезі. Осы тұста Президент бірлігімізді сақтап, еліміздің игілігі үшін аянбай тер төгуіміз керек екенін айтты. Біріміз – бәріміз үшін, бәріміз – біріміз үшін деген қағиданы ұстанып, еңбек етуге тиіспіз. Сонда қазіргі қиыншылықтардың бәрін жеңуге жол ашылады. Бүгінгі дағдарыстың бәрінің өткінші екені де анық. Ал елдің тәуелсіздігі, ұлттың мұраты, ұрпақтың болашағы біздің мәңгілік құндылықтарымыз болып қала бермек. Ендеше, көлденең кезіккен кедергілерге кідірмеуіміз керек. 
   Елбасы жастарға қаратып өте орынды сөз айтты. Қазір білім алудан шаршауға болмайды. Жалқаулық танытып, бүгін жасайтын нәрсені ертеңге қалдырған адам, қазақшалап айтқанда, көштің соңында қалады. Себебі, қазір күн сайын емес, минут, тіпті секунд сайын бір ғылыми жаңалық ашылып жатқан кез. Ал сондай сәтте бір тәулікке кешігудің салдары кері әсерін тигізеді. Осыны ескерген Елбасы жастарды белсенді болуға, ерінбеуге, әр нәрсеге жауапкершілікпен қарауға, батыл әрекеттер жасауға шақырып отыр. Президенттің бұл сөздері жастардың рухын көтеріп, жігерін жанитыны анық. Бәсекеге қабілетті ел болудың негізі – алдымен сол елдің жастарын соған лайық тәрбиелеу. Ендеше, жастардың жалындап жанатын шағы туды деп біздің ұжым да санайды.
  Бүгінгі жолдауында көтерілген мәселелердің маңыздылығын түсіне отыра, Елбасының сөзін құптап,өзім де, мектеп ұжымы да Қазақстанның дамуына өз үлесімізді қосуға дайынбыз және елімнің қуатты да мықты мемлекет болып дамитынына сенімдімін.
 

ЖББОМ №66 Оспанова Қ.М. - ақпараттық насихат тобының мүшесі.